सकाळ वृत्तसेवा
ठाणे, ता. ११ : ठाण्यातील तीन हात नका परिसरात लावलेल्या फलकावर ठाकरे बंधू एकत्र येण्याची महाराष्ट्राची इच्छा असल्याचे लिहिले होते. तसेच या फलकाच्या माध्यमातून नितेश राणे यांनादेखील डिवचताना आक्षेपार्ह मजकूर लिहिण्यात आला होता. त्यामुळे तणाव निर्माण होण्याची शक्यता असल्याने महापालिकेच्या अतिक्रमण नियंत्रण विभागाने तत्काळ फलक हटविण्याची कारवाई केली.
माजी मुख्यमंत्री उद्धव ठाकरे आणि मनसेप्रमुख राज ठाकरे हे दोन बंधू एकत्र येण्याची चर्चा रंगली आहे. या दोन्ही पक्षांचे नेते एकत्रितपणे आंदोलन करीत आहेत. गेल्या काही दिवसांत दोन्ही पक्षांचे कार्यकर्ते अधिक सक्रिय झाल्याचे दिसून येत आहे. असे असतानाच ठाण्यात ठाकरे गटाचे पदाधिकारी तुषार रसाळ यांनी तीन हात नाका चौकात लावलेला फलक चर्चेचा विषय ठरला होता. या फलकावर ‘देवेंद्र गंगाधर फडणवीस माझे वडील नाहीत. मी, दिवंगत दिलीप पंढरीनाथ रसाळ यांचा मुलगा तुषार दिलीप रसाळ’ असा मजकूर लिहिलेला आहे. या माध्यमातून भाजप नेते नितेश राणे यांना लक्ष्य केले गेल्याचे बोलले जात आहे. तसेच दोन मराठी वाघ एकत्र येणे, ही महाराष्ट्राची इच्छा असल्याचे सांगत एकत्र येण्यासाठी साद घातली आहे. या फलकामुळे वाद उद्भवण्याची शक्यता असल्याने पालिकेच्या अतिक्रमण नियंत्रण विभागाने तातडीने फलक हटविण्याची कारवाई केली.