तिसगावातील जरीमरी तलावाची स्वच्छता
महापालिकेकडून राडारोडा उपसण्याचे काम
कल्याण, ता. १२ (बातमीदार) : मे महिन्यातील मुसळधार पावसानंतर आता काहीकाळ पाऊस विश्रांतीवर गेला आहे. त्यामुळे महापालिकेला नालेसफाईसाठी अवधी मिळाला आहे. कल्याण पूर्वेतील तिसगावातील जरीमरी तलावावर महापालिकेने स्वच्छता मोहीम राबविली आहे. नव्यानेच कंत्राट मिळालेल्या कंपनीमार्फत तलावातील राडारोडा काढून तलाव स्वच्छ करण्याचे काम हाती घेण्यात आले आहे.

शहरात अनेक नैसर्गिक तलाव आहेत. त्यापैकीच तिसगावातील जरीमरी तिसाई मंदिराच्या मागील भागात असलेला जरीमरी तलाव उन्हाळ्यात कोरडा पडतो. काही वर्षांपूर्वीच या तलावाचे सुशोभीकरण करण्यात आले होते. शहरातील गणेशोत्सव, नवरात्रोत्सवादरम्यान मूर्त्यांचे विसर्जन केले जाते. कालांतराने तिसाई देवस्थान पंच कमिटीने मोठ्या मूर्त्यांचे तलावात विसर्जन करण्यावर प्रतिबंध लावले; मात्र तरीही घरगुती मूर्त्यांचे विसर्जन, विविध विधी, पूजा या तलावावर होतात. यामुळे तयार होणाऱ्या निर्माल्याचेही विसर्जन तलावातच केले जाते. यामुळे तलावाच्या तळाशी मोठ्या प्रमाणावर राडारोडा जमा होतो.

उन्हाळ्यात तलावातील पाणी आटल्यानंतर संपूर्ण राडारोडा बाहेर काढण्यात येतो. तर पावसाळ्यात साधारणपणे गणेशोत्सवापर्यंत हा तलाव अगदी काठोकाठ भरलेला असतो. बऱ्याचदा अतिवृष्टीमुळे तलाव आणि रस्त्यावरील पाण्याची एकच पातळी झाल्याचेही पाहायला मिळते. तलावाच्या जवळच रहिवासी संकुले असल्याने तलावातील पाणी ओसंडून बाहेर येऊ नये, यासाठी पावसाळ्यापूर्वीच तलावातील जमलेला गाळ काढण्यात येतो.