ऑनलाइन फसवणुकीचा पर्दाफाश
धारावी, ता. १२ (बातमीदार) : बकरी ईदनिमित्त विविध ठिकाणांहून बकरे घेऊन व्यापारी देवनार बकरा मंडीमध्ये येतात. चार पैसे जास्त मिळतील, या आशेने त्यांनी व्याजाने पैसे घेऊन बकरे देवनारला आणलेले असतात. असाच एक व्यापारी बिरजू चितोडिया व त्याची आई रामूबाई चितोडिया हे सहा ते सात बकरे घेऊन देवनारला आले होते. बुधवारी (ता. ४) सायंकाळी एक व्यक्ती बकरा खरेदीसाठी आली. त्याने बरीच घासाघीस करून बकऱ्याचा सौदा ३०,२०० रुपये ठरवला. त्यानंतर त्याने एका ॲपचा वापर करून ऑनलाइन पेमेंटसंदर्भात बनावट स्क्रीनशॉट तयार करून तो व्यापाऱ्याला दाखवला. नेटवर्क कमी आहे. थोड्यावेळात पैसे येऊन जातील, असे सांगून ती व्यक्ती बकरा घेऊन निघून गेली.
२४ तास उलटूनदेखील रक्कम प्राप्त होत नसल्याने व्यापाऱ्याने बँकेत जाऊन पैसे जमा झाले आहेत का, याची खातरजमा केली; मात्र खात्‍यात रक्‍कम आली नसल्‍याचे त्‍यांना सांगण्यात आले. त्‍यांनी देवनार पोलिस ठाण्यात याबाबत तक्रार दिली. गुन्हा नोंद करून देवनार पोलिस ठाण्याचे वरिष्ठ पोलिस निरीक्षक बासित अली सय्यद, पोलिस निरीक्षक आंबरगे यांच्या मार्गदर्शनाखाली पथक तयार करण्यात आले.
सहाय्यक पोलिस निरीक्षक सोनवणे, पोलिस उपनिरीक्षक देशमुख यांनी गुप्त बातमीदार व तांत्रिक माहितीच्या आधारे मालाड येथून शोध घेऊन आरोपीला ताब्यात घेतले. त्याच्याकडून गुन्ह्यातील मालमत्ता हस्तगत केली आहे. त्यानंतर फिर्यादी व त्याची वयोवृद्ध आई यांना फसवणूक झालेले ३०,२०० रुपये परत करण्यात आले.