क्रशर व खाण मालकांकडून महसूलमंत्र्याची भेट
पेण, ता. १२ (वार्ताहर) : तालुक्यातील क्रशरधारक व खाण मालक यांनी उद्भवणाऱ्या समस्यांची सोडवणूक व्हावी, या दृष्टिकोनातून बुधवारी (ता. ११) खासदार सुनील तटकरे यांच्या माध्यमातून महसूलमंत्री चंद्रशेखर बावनकुळे यांची मुंबई येथे भेट घेतली.
स्थानिक क्रशरधारक व खाण मालक यांना व्यवसाय करणे जिकिरीचे बनत आहे. सर्व प्रकारच्या शासकीय परवानग्या असतानाही प्रशासकीय स्तरावर वारंवार त्रास होत आहे. यांसारख्या समस्या क्रशरधारक व खाण मालकांनी या वेळी मांडल्या. यावर बावनकुळे यांनी तालुक्यातील क्रशरधारक तसेच खाणमालक यांच्याशी संवाद साधून त्यांच्या समस्या दूर करण्याचे आश्वासन दिले. या वेळी धनाजी भगत, अशोक भगत, वैकुंठ पाटील, शशिकांत भगत, नरेंद्र ठाकूर आदी उपस्थित होते.