टोकावडे ता. १२ (बातमीदार)ः मुरबाड तालुक्यातील मढ आश्रमशाळेची नवीन इमारत बांधून तयार आहे, मात्र तरीदेखील मुलांना पोल्ट्रीच्या शेडमध्ये अभ्यासाचे धडे गिरवावे लागत असल्याने पालकांनी आंदोलनाचा इशारा दिला आहे.
मुरबाड तालुक्यात आदिवासी मुलांच्या शिक्षणासाठी मढ, मोरोशी, माळ, काचकोली, अशा शासकीय चार तर वाल्हीवरे, झापवाडी, तळवली या तीन खासगी आश्रमशाळा अशा सात आश्रमशाळा आहेत. या शाळांवर दरवर्षी लाखो रुपयांचा खर्च केला जातो, पण मढ येथील आश्रमशाळा अजूनही पोल्ट्री शेडमध्ये भरत आहे. १० वीपर्यंत आलेल्या पोल्ट्री शेडमधील या शाळेत शेकडो विद्यार्थी शिक्षण घेत आहेत. निवासी शाळा असल्याने पालकांपासून दुरावलेली मुले तिथे राहात आहेत, परंतु शाळा परिसरातील जंगल, वाढलेले रानगवतामुळे विंचू, साप यांचा वावर आहे. शासनाने करोडो रुपये खर्च करून मुलांसाठी कळंबाड ग्रामपंचायत हद्दीतील दुर्गापूरजवळ सुसज्ज इमारत बांधली आहे. तरीही शेडमध्ये मुलांना शिक्षण घ्यावे लागत आहे. १६ जून रोजी नवीन इमारतीमध्ये मुलांचा शाळा प्रवेश करावा, अन्यथा परवानगीशिवाय प्रवेशोत्सव केला जाणार असल्याचे निवेदन दिले आहे. याबाबत आदिवासी विकास प्रकल्प अधिकारी राजेंद्र हिवाळे यांच्याशी संपर्क केला असता त्यांनी प्रतिसाद दिला नाही.
...............
आदिवासी विभागाने करोडो रुपये खर्च करून मढ आश्रमशाळेसाठी सुसज्ज इमारत बांधली आहे. तरीही पोल्ट्री शेडमध्ये विद्यार्थ्यांना शिक्षण घ्यावे लागत आहे. १६ जूनपासून नवीन इमारतीत वर्ग सुरू केले नाहीत, तर आदिवासी संघटना आक्रमक भूमिका घेणार आहेत.
-नारायण सावळा, सदस्य, शालेय व्यवस्थापन समिती, मढ आश्रमशाळा