पालघरमध्ये वादळी वाऱ्यामुळे शाळेचे छत कोसळले
पालघर, ता. १३ (बातमीदार)ः राज्यातील शाळा लवकरच सुरू होणार असतानाच विद्यार्थ्यांचे स्वागत करण्यासाठी शाळेची रंगरंगोटी सुरू आहे. अशातच, पालघर येथील जीवन विकास शिक्षण संस्थेच्या स. तु. कदम विद्यालय प्राथमिक, माध्यमिक, कला, वाणिज्य कनिष्ठ महाविद्यालय या शाळेचे छत शुक्रवारी (ता. १३) वादळी वाऱ्यामुळे कोसळले. यात शाळेच्या चार वर्गखोल्यांचे पत्रे उडाले असून मोठे नुकसान झालेले आहे.
पालघर परिसरात शुक्रवारी पहाटेच्या सुमारास मेघगर्जना आणि वादळी वाऱ्यासह पाऊस पडला. यात पालघर येथील मराठी माध्यमाच्या स. तु. कदम विद्यालय या शाळेच्या पहिल्या माळ्यावरील वर्गखोल्यांचे छत उडाल्याने मोठे नुकसान झाले आहे. यात वर्गखोल्यांचे पत्रे त्यामधील बेंचेस, खिडक्या, इलेक्ट्रिक साहित्याचे नुकसान झाले आहे. शाळा सुरू होण्याच्या दोन दिवस आधीच नैसर्गिक आपत्ती कोसळल्याने शिक्षक व पालकवर्गात चिंता व्यक्त करण्यात येत आहे. विशेष म्हणजे, हे वादळी वारे तेवढ्याच भागामध्ये चक्रीवादळासारखे आल्याने त्या भागातील शाळा इमारतीचे पत्रे उडाले. अशा घटना पालघर तालुक्यात अनेक वेळा काही ठिकाणी घडलेल्या आहेत.

फोटो ः पालघर येथील स. तु. कदम विद्यालयातील इमारतीचे उडालेले पत्रे.