वारकऱ्यांसाठी राबवणार
‘चरणसेवा’ उपक्रम
सकाळ वृत्तसेवा
मुंबई, ता. १३ : आषाढी वारीसाठी पंढरपूरकडे निघालेल्या लाखो वारकऱ्यांसाठी यंदाही मुख्यमंत्री वैद्यकीय सहाय्यता कक्षातर्फे ‘चरणसेवा’ हा उपक्रम राबवण्यात येणार आहे. मुख्यमंत्री देवेंद्र फडणवीस यांच्या मार्गदर्शनाखाली दूरदृष्टीतून नाशिक, जालना, सातारा, पुणे आणि सोलापूर या जिल्ह्यांतून निघणाऱ्या पालख्यांत सहभागी होणाऱ्या वारकऱ्यांना या उपक्रमाच्या माध्यमातून थकलेल्या पायांना फिजिओथेरपीसह इतर सेवा देण्यात येणार आहेत.

उपक्रमासाठी सुमारे पाच हजार वैद्यकीय अधिकारी, फिजिओथेरपिस्ट, पॅरामेडिकल कर्मचारी, वैद्यकीय महाविद्यालयांचे विद्यार्थी आणि स्वयंसेवक तैनात करण्यात आले आहेत. स्थानिक आरोग्य यंत्रणा, जिल्हा प्रशासन, स्वयंसेवी संस्था तसेच शासकीय व खासगी वैद्यकीय महाविद्यालयांच्या समन्वयातून ही सेवा दिली जात आहे. ‘भक्ती विठोबाची, सेवा आरोग्याची!’ हे ब्रीद घेऊन ‘चरणसेवा’ उपक्रम वारकऱ्यांच्या सेवेसाठी कार्यरत आहे. पायी प्रवास करणाऱ्या वारकऱ्यांसाठी कक्षाच्या पुढाकारातून ‘चरणसेवा’ दिली जात आहे. गरजेनुसार आरोग्यविषयक इतर सुविधा देण्यासाठी संपूर्ण टीम सज्ज आहे, असे मुख्यमंत्री सहाय्यता निधी व धर्मादाय रुग्णालय मदत कक्षाचे प्रमुख रामेश्वर नाईक यांनी माहिती दिली.
---
४३ ठिकाणी तपासणी केंद्रे
सूज, वेदना, जळजळ यांसारख्या तक्रारींवर तातडीने उपचार मिळावेत, यासाठी आरोग्य पथक सज्ज आहे. दिंडी मार्गावर ४३ ठिकाणी मुक्काम व्यवस्था आणि सुसज्ज वैद्यकीय तपासणी केंद्रे उभारण्यात आली आहेत. या माध्यमातून वारकऱ्यांना केंद्र आणि राज्य शासनाच्या आरोग्यविषयक योजनांची माहितीही दिली जाणार आहे.