ठाण्यात वाहने बंद पडल्याने मोठी वाहतूक कोंडी
ठाणे शहर, ता. १३ (बातमीदार) : मुंबई-नाशिक महामार्ग, घोडबंदर आणि बाळकुम परिसर अशा तीन ठिकाणी अवजड वाहने बंद पडल्याच्या घटना घडल्याने शुक्रवारी मोठी वाहतूक कोंडी झाली. दोन ठिकाणी बंद पडलेली वाहने काही मिनिटांतच बाजूला करण्यात आली, मात्र बाळकुम येथे अवजड वाहनाचा पाटा तुटल्याने हे वाहन बाजूला काढण्यासाठी काहीसा उशीर झाल्याने येथील नागरिकांना वाहतूक कोंडीचा सामना करावा लागला.

दोन दिवसांपूर्वीच मुंबई-नाशिक महामार्ग, घोडबंदर रोड आणि रवी इस्टेट परिसरात तीन ठिकाणी वाहने बंद पडल्याच्या घटना घडल्या असतानाच शुक्रवारी (ता.१३) शहरात पुन्हा अशाच घटना घडल्या. मुंबई-नाशिक महामार्ग, बाळकूम वाय जंक्शन आणि बाळकूम प्रभाग समिती परिसरात दुपारच्या वेळेत जड अवजड वाहने बंद पडली. त्यामुळे तीनही ठिकाणी वाहनांची मोठी कोंडी झाली होती. नाशिक मार्गावर बंद पडलेला कंटेनर रोलरच्या मदतीने रस्त्याच्या बाजूला करण्यात आला, मात्र तोपर्यंत महामार्गावर वाहनांची मोठी रांग लागली होती. कंटेनर बाजूला केल्यानंतर तासाभराने या मार्गावरील वाहतूक सुरळीत झाली. तर दुसऱ्या घटनेत बाळकुम वाय जंक्शन येथे मिक्सर बंद पडल्याने घोडबंदर ठाणे मार्गावर वाहनांची कोंडी झाली. वाहतूक पोलिसांच्या मदतीने काही वेळाने हे वाहन दुरुस्त करण्यात आले, मात्र या मार्गावरसुद्धा वाहनांची मोठी कोंडी झाली होती. तिसरी घटना बाळकुम प्रभाग समिती जवळची असून, येथे रसायन वाहून नेणाऱ्या टँकरचा पाटा तुटल्याने वाहन रस्त्यावर बंद पडले. त्यामुळे हा टँकर बाजूला काढण्यासाठी बराच विलंब लागला. त्यामुळे परिसरातील नागरिकांना कोंडीचा सामना करावा कागला. या वेळेत कापुरबावडी उप वाहतूक विभागाच्या अधिकारी, कर्मचाऱ्यांनी वाहतुकीचे नियोजन करून वाहतूक पुन्हा पूर्ववत केल्याची माहिती वरिष्ठ पोलिस निरीक्षक (वाहतूक) मंजुषा भोंगळे यांनी दिली.

फोटो ः तीन ठिकाणी बंद पडलेली वाहने