भिवंडी, ता. १४ (वार्ताहर)ः भिवंडी गुन्हे शाखेने दुचाकी चोरी प्रकरणात एका सराईत गुन्हेगाराला अटक केली आहे. त्याच्याकडून चोरीच्या सहा दुचाकी पोलिसांनी हस्तगत केल्या आहेत.
नारपोली पोलिस ठाण्यात दाखल दुचाकीचोरीच्या गुन्ह्याचा समांतर तपास भिवंडी गुन्हे शाखा करीत होते. याचदरम्यान, पोलिस हवालदार साबीर शेख यांना मुंब्रा येथील एका संशयित दुचाकी चोराची माहिती मिळाली होती. त्याआधारे पोलिसांच्या पथकाने अशी रजाउल अन्सारी (वय २४, रा. आझादनगर, मुंब्रा) याला अटक केली. तसेच नारपोली, निजामपूर, खडकपाडा, माटुंगा पोलिस ठाण्यात दाखल दुचाकी चोरीच्या चार गुन्ह्यांची कबुली दिली असून एक लाख ७७ हजार रुपये किमतीच्या सहा दुचाकी पोलिसांनी जप्त केल्या आहेत.