नालेसफाई असमाधानकारक
स्वच्छता अधिकारी निलंबित
कल्याण, ता. १४ (वार्ताहर) : कल्याण-डोंबिवली महापालिका आयुक्त अभिनव गोयल यांनी गुरुवारी (ता. १२) दिवसभरात कल्याण पूर्वेतील जे आणि ड प्रभाग क्षेत्रातील नालेसफाई व परिसर स्वच्छतेची पाहणी केली. जे प्रभागात आयुक्तांनी लोकग्राम व मंगलराघोनगर या परिसरातील मध्यम नाल्यांची सफाई व परिसर स्वच्छतेची पाहणी केली. या नाल्यांची ६५-७० टक्के सफाई झाल्याची माहिती प्रभागाचे सहाय्यक आयुक्त सचिन तामखेडे यांनी दिली. तसेच ड प्रभागात आयुक्तांनी विजयनगर नाका व तिसगाव पाडा या परिसरात प्रत्यक्ष भेट देऊन नालेसफाई व परिसर स्वच्छतेची पाहणी केली. पाहणीदरम्यान काही ठिकाणी नालेसफाईचे काम असमाधानकारक असल्याचे निदर्शनास आल्याने ड प्रभागातील स्वच्छता अधिकारी राजेंद्र खैरे यांना निलंबित करण्यात आले.

नालेसफाई पाहणीपूर्वी महापालिका आयुक्त अभिनव आयुक्त यांच्या अध्यक्षतेखाली जे आणि ड प्रभागातील आपत्कालीन परिस्थितीतील पूर्वतयारीचा सविस्तर आढावा घेण्यासाठी बैठक झाली. या बैठकीत धोकादायक व अतिधोकादायक इमारतींची संख्या, त्या इमारतीतून रहिवासमुक्त केलेल्या कुटुंबांची संख्या तसेच अनधिकृत होर्डिंगविरोधातील कारवाईबाबत सविस्तर चर्चा केली. तसेच पुढील आठ दिवसांत प्रभागातील सर्व नाल्यांची सफाई पूर्ण करण्याच्या सूचना महापालिका आयुक्तांनी संबंधित अधिकाऱ्यांना दिल्या. या वेळी शहर अभियंता अनिता परदेशी, अतिरिक्त आयुक्त हर्षल गायकवाड, योगेश गोडसे, उपआयुक्त प्रसाद बोरकर, संजय जाधव, कार्यकारी अभियंता घनश्याम नवांगुळ, मनोज सांगळे, जे प्रभागाचे सहाय्यक आयुक्त सचिन तामखेडे, ड प्रभागाचे सहाय्यक आयुक्त उमेश यमगर आदी उपस्थित होते.