उरण, ता. १५ (वार्ताहर) : राज्य परिवहन महामंडळाच्या मुंबई विभागातील उरण आगारात पाच नवीन बस दाखल झाल्या आहेत. या नवीन बसचे पूजन व लोकार्पण आमदार महेश बालदी यांच्या हस्ते पार पडले.
भविष्यात उरणमध्ये येणाऱ्या प्रवाशांची संख्या वाढणार आहे. मतदारसंघातील नागरिक, विशेषतः शालेय विद्यार्थ्यांच्या सोयीसाठी ज्यादा बस मिळाव्यात, यासाठी पाठपुरावा केला होता. प्रवाशांची वाढती संख्या लक्षात घेता बसचे नियोजन करताना तारेवरची कसरत होते. जून महिन्यात उरण एसटीच्या ताफ्यात नवीन बस दाखल झाल्या आहेत. पुढील काळात आणखी पाच बस मिळण्यासाठी प्रयत्न करणार असल्याचे आमदार महेश बालदी यांनी सांगितले. या वेळी आगार व्यवस्थापक गीता कोंडार, उरण विधानसभा प्रमुख रवी भोईर, उरण तालुका शहर मंडळ अध्यक्ष प्रसाद भोईर, महिला तालुका अध्यक्षा राणी म्हात्रे, उरण शहर अध्यक्ष कौशिक शहा, माजी उपनगराध्यक्ष जयवीन कोळी, युवा शहर अध्यक्ष नीलेश पाटील, तालुका सरचिटणीस कैलास भोईर, सुनील पाटील आदी भाजपचे कार्यकर्ते आणि एसटीचे चालक व कर्मचारी उपस्थित होते.