कुरूळ येथील आरसीएफ शाळेच्या व्यवस्थापनात अखेर बदल
डेक्कन एज्युकेशन सोसायटीकडून शाळा संचालनास नकार
अलिबाग, ता.१५ (वार्ताहर) ः राष्ट्रीय केमिकल्स अॅंड फर्टिलायझर्स लिमिटेडच्या (आरसीएफ) कुरूळ येथील शाळेच्या व्यवस्थापनात अखेर बदल केला आहे. शैक्षणिक वर्ष २०२५-२६ पासून आरसीएफ शाळेचे व्यवस्थापन डीएव्ही कॉलेज मॅनेजिंग कमिटी, नवी दिल्ली यांच्याकडे सोपवण्यात आला आहे. आरसीएफ शाळेच्या प्रशासनाकडून यासंदर्भातील अधिकृत सूचना शनिवारी (दि.१४) प्रसिद्ध करण्यात आली आहे.
आरसीएफ कंपनीतर्फे अलिबाग तालुक्यातील कुरुळ येथे शाळा उभारण्यात आली आहे. या शाळेचे व्यवस्थापन पुणे येथील डेक्कन एज्युकेशन सोसायटी संस्थेकडे होते. परंतु, संस्था शाळा चालविण्यास इच्छुक नसून याबाबत आरसीएफ कंपनी व्यवस्थापनासोबत पत्रव्यवहार केला होता. मात्र, शाळा सुरू रहावी यासाठी शिक्षक आणि शिक्षकेतर कर्मचारी यांनी शाळा व्यवस्थापन विरोधात उच्च न्यायालयात याचिका दाखल केली.
डेक्कन एज्युकेशन सोसायटी संस्थेने किमान दोन वर्ष शाळा चालवावी, अशी विनंती न्यायालयात आरसीएफ कंपनीने केली होती. मुलांना शिक्षण मिळावे ही भावना कंपनीची आहे. वेळप्रसंगी दुसरी संस्था निवडून शाळा सुरू ठेवण्याचा प्रयत्न कंपनी करेल, असे आश्वासन देण्यात आले होते. त्यामुळे विद्यार्थ्यांच्या शैक्षणिक हिताची पूर्तता व्हावी यासाठी आरसीएफ प्रशासनाने नवी जबाबदारी दिल्लीतील डीएव्ही कॉलेज मॅनेजिंग कमिटीवर सोपवण्याचा निर्णय घेतला आहे.
नवीन संस्थेमार्फत शैक्षणिक वर्ष २०२५-२६ पासून शाळा पुनर्रचित होणार असून, त्यासाठी आवश्यक हस्तांतर प्रक्रिया लवकरच पूर्ण केली जाणार आहे. विद्यार्थ्यांचे शैक्षणिक नुकसान होऊ नये. यासाठी शाळा प्रशासनाने पालक व विद्यार्थ्यांना नवीन व्यवस्थापन बदलामध्ये सहकार्य करण्याचे आवाहन केले आहे.