शाळेच्या पहिल्याच दिवशी कोंडीमुळे मनस्ताप
उड्डाणपुलावर वाहनांच्या रांगा; वाहनचालकांचा संताप

बदलापूर, ता. १६ (बातमीदार) : उन्हाळी सुट्टीनंतर शाळेला निघालेल्या विद्यार्थ्यांना वाहतूक कोंडीचा त्रास सहन करावा लागला आहे. सोमवारी (ता. १६) शाळेच्या पहिल्याच दिवशी स्वातंत्र्यवीर सावरकर उड्डाणपुलावर मोठ्या प्रमाणात वाहतूक कोंडी झाली होती. यामुळे चालकांनी संताप व्यक्त केला आहे. तर वाहतूक पोलिसांची ही कोंडी फोडण्यासाठी मोठी दमछाक झाली.

शहरात कोंडीची समस्या नवीन नसली तरी दोन महिन्यांच्या उन्हाळी सुट्टीनंतर शाळेचा पहिला दिवस भरणाऱ्या अनेक विद्यार्थ्यांना वाहतूक कोंडीचा सामना करावा लागला. आधीच रात्रीपासून पाऊस बरसत आहे. त्यातच शाळेच्या पहिल्या दिवसाची घाई असताना वाहतूक कोंडीत अडकल्याने अनेक विद्यार्थ्यांना शाळेत पोहोचायला उशीर झाला. बदलापूर पूर्व आणि पश्चिम परिसराला जोडणारा एकमेव पर्याय असलेल्या या स्वातंत्र्यवीर सावरकर उड्डाणपुलावर वाहनांच्या लांबच लांब रांगा पाहायला मिळाल्या.

सततच्या वाहतूक कोंडीची समस्या पाहता अनेकदा बेशिस्त वाहनचालक, अनधिकृत पार्किंगमुळे होत असलेल्या कोंडीला सोडवताना वाहतूक पोलिसांची मोठी दमछाक होते. आधीच वॉर्डनची कमतरता आहे, त्यात पालिकेने ट्रॅफिकचे योग्य नियोजन केलेले नाही, यामुळे पोलिसांना मोठा त्रास सहन करावा लागला.

बेशिस्त वाहनचालकांना शिस्त लागावी, तसेच शॉर्टकटच्या नादात हा त्रास होऊ नये, यासाठी पालिकेने उड्डाणपुलाच्या दोन्ही टोकाला लोखंडी दुभाजक लावणे आवश्यक आहे.
- किरण जिरे, वाहतूक पोलिस

२० नव्या वॉर्डनच्या नियुक्तीसाठी प्रक्रिया पूर्ण करीत आहे. तसेच वाहतूक पोलिस निरीक्षक पुराणिक यांना बोलावून या ठिकाणी वाहतूक कोंडीच्या कारणांची पाहणी करणार आहे. तसेच वाहतुकीला अडथळा ठरणाऱ्या ठिकाणी जे काही नियोजन किंवा वाहतूूक पोलिसांना अपेक्षित लोखंडी दुभाजक त्या ठिकाणी बसवण्याची व्यवस्था करण्यात येईल. दोनच दिवसांत ही अडचण मार्गी लावण्यात येईल.
- मारुती गायकवाड, मुख्याधिकारी, कुळगाव-बदलापूर नगर परिषद