नौदल करणार ‘एमएमआरडीए’च्या प्रकल्पांचा अभ्यास

सकाळ वृत्तसेवा
मुंबई, ता. १६ : मुंबईसह एमएमआर क्षेत्रातील पायाभूत सुविधांना चालना देण्याबरोबरच मुंबईकरांच्या प्रवासाचा वेग वाढावा म्हणून एमनएमआरडीए मेट्रो, उड्डाण पूल, भुयारी मार्ग असे प्रकल्प उभारत आहे. त्याची नौदलाने दखल घेतली असून एमएमआरडीए उभारत असलेल्या विकास प्रकल्पांची आपल्याही अभियंत्यांना माहिती व्हावी, त्याच्या तांत्रिक बाबी जाणून घेण्यासाठी नौदलाचे अभियांते या प्रकल्पांचा अभ्यास करणार आहे. त्यासाठी नौदलाचे व्हाइस ॲडमिरल दीपककुमार गोस्वामी (महासंचालक) यांनी सोमवारी (ता.१६) एमएमआरडीएचे आयुक्त डॉ. संजय मुखर्जी घेतली आहे.

एमएमआरडीए उभारत असलेल्या पायाभूत सुविधा प्रकल्पांमुळे मुंबईसह परिसरातील नागिरकांना मोठा दिलासा मिळणार आहे. त्यामुळे या पायाभूत प्रकल्पांचे स्वरूप, व्याप्ती आणि दूरदृष्टी याचा नौदलातील अभियंत्यांना अभ्यास करण्याची परवानगी मिळावी असा प्रस्ताव ॲडमिरल दीपककुमार गोस्वामी यांनी एमएमआरडीएपुढे ठेवला आहे. त्याबाबत बोलतना एमएमआरडीएचे आयुक्त डाॅ. संजय मुखर्जी म्हणाले, ‘विविध क्षेत्रांतील ज्ञानाची देवाण-घेवाण देशनिर्मितीस अधिक बळकटी देतो. त्यामुळेच आता नौदलाचे अभियंते प्राधिकरणाच्या प्रकल्पांचा अभ्यास करणार असून ही सकारात्मक बाब आहे.

एमएमआरडीए राबवत असलेले प्रकल्प
- ३३७ किलोमीटरचे मेट्रो नेटवर्क
- २०० किलोमीटरहून अधिक लांबीचे रस्ते प्रकल्प
- ‘शून्य सेतू’ हा वैशिष्ट्यपूर्ण पूल
- १६,००० हून अधिक कुटुंबांचे एसआरए प्रकल्पांतर्गत पुनर्वसन
- मुंबईला एमएमआरशी जोडण्यासाठी उभारलेला ‘अटल सेतू’