खारघर, ता. १७ (बातमीदार) : ऑल इंडिया सैनिक स्कूल प्रवेश परीक्षेत खारघरमधील क्षितिज कल्याण जाधव हा राज्यात प्रथम; तर देशात १२व्या क्रमांकाने उत्तीर्ण झाला आहे. एप्रिलमध्ये पार पडलेल्या ऑल इंडिया सैनिक स्कूल प्रवेश परीक्षेत देशातील विविध प्रांतातील विद्यार्थी सहभागी झाले होते. या परीक्षेत खारघरमधील रामशेठ ठाकूर पब्लिक स्कूलमध्ये चौथीत शिक्षण घेणाऱ्या क्षितिज जाधव याने ३०० पैकी २९६ गुण प्राप्त करून महाराष्ट्रात प्रथम; तर देशात १२वा क्रमांक प्राप्त केला. त्याने मिळवलेल्या यशाची दखल घेत माजी नगरसेविका नेत्रा पाटील, तसेच युवाप्रेरणा सामाजिक संस्थेचे अध्यक्ष किरण पाटील यांनी क्षितिजचा सत्कार करून पुढील वाटचालीस शुभेच्छा दिल्या. रामशेठ ठाकूर पब्लिक स्कूलच्या प्राचार्य राज अलोनी यांनी क्षितिजचे अभिनंदन करून शाळेचे आणि खारघरचे नाव उज्ज्वल केल्याबद्दल समाधान वाटत असल्याचे सांगितले.