पालघर, ता. १७ (बातमीदार) : येत्या काही वर्षांमध्ये पालघर जिल्ह्यामध्ये तीन लाख कोटींची गुंतवणूक होणार आहे. या माध्यमातून दहा लाख रोजगारनिर्मिती होणार असल्याचा विश्वास वन मंत्री तथा पालघर जिल्ह्याचे पालकमंत्री गणेश नाईक यांनी व्यक्त केला.

मुख्यमंत्री देवेंद्र फडणवीस यांनी राज्याच्या विकासाचा मूलभूत आराखडा तयार करून तो कृतीमध्ये आणण्यासाठी सर्व विभागांना शंभर दिवसाचा सात कलमी कार्यक्रम दिला होता. तो सर्व विभागांनी यशस्वीरित्या पूर्ण केला आहे. येत्या काळात दीडशे दिवसांचा कृती आराखडा देण्यात येणार आहे. या आराखड्याबाबत प्रशासकीय यंत्रणा गांभीर्याने कामाला लागली असल्याचे नाईक यांनी मनोर येथे सोमवारी (ता. १६) सांगितले.

वन विभागामार्फत राज्यात ११ कोटी झाडे लावण्याचे उद्दिष्ट असून त्या दृष्टीने वन विभागाची गतिमान पद्धतीने वाटचाल सुरू आहे. तसेच येत्या साडेचार वर्षांमध्ये २५० कोटी झाडे लावण्याचे उद्दिष्ट वन विभागाने ठेवले आहे. पालघर जिल्हा निसर्गरम्य जिल्हा आहे. आता या जिल्ह्याची प्लॅस्टिकमुक्त, दुर्गंधीमुक्त या ध्येयाकडे वाटचाल चालू असल्याचे नाईक यांनी सांगितले.

शाळांमध्ये कौशल्य विकास अभ्यासक्रम
पालघर जिल्ह्यामध्ये ७३५ शासकीय शाळा असून कौशल्य विकास अभ्यासक्रम सुरू करण्यासाठी सरकार सकारात्मक असल्याचे कौशल्य विकास मंत्री मंगल प्रभात लोढा यांनी सांगितले. वाढवण बंदरामध्ये रोजगार मिळण्यासाठी जो अभ्यासक्रम आवश्यक आहे, ते सर्व अभ्यासक्रम कौशल्य विकास विभागामार्फत सुरू करण्यात येणार असल्याचे लोढा यांनी सांगितले.

रोजगारासाठी सामंजस्य करार
कौशल्य विकास विभाग व रोजगारासंबंधी उपक्रम राबविण्याकरिता कौशल्य, रोजगार, उद्योजकता व नाविन्यता विभाग आणि वाढवण पोर्ट प्रायव्हेट लिमिटेड यांच्यादरम्यान सामंजस्य करार करण्यात आला. सवलतीच्या व्याजदरात डायमेकर क्लस्टरसाठी जेएनपीए आणि युनियन बँक ऑफ इंडिया यांच्या सहकार्याने राबविण्यात येणाऱ्या आर्थिक योजनेअंतर्गत सवलतीच्या व्याजदरात निधी उपलब्ध करून देणारे निधीपत्र मुख्यमंत्री देवेंद्र फडणवीस यांच्या हस्ते वितरित करण्यात आले. जिल्ह्यातील सर्व शासकीय औद्योगिक प्रशिक्षण संस्थांमधील प्रशिक्षणार्थीना आर्टिफिशियल इंटेलिजन्ससंबंधित प्रशिक्षण देण्याकरिता कौशल्य, रोजगार, उद्योजकता व नाविन्यता विभाग आणि कॉनफेडरेशन ऑफ इंडिया इंडस्ट्रीज यांच्यादरम्यान सामंजस्य करार करण्यात आला. शासकीय आयटीआयमधील प्रशिक्षणार्थींना प्रशिक्षण व रोजगार उपलब्ध करून देण्याकरिता कौशल्य रोजगार उद्योजकता व नाविन्यता विभाग व ब्लू स्टार कंपनी औद्योगिक आस्थापने दरम्यान सामंजस्य करार करण्यात आला.