भिवंडी (वार्ताहर)ः राज्य, राष्ट्रीयस्तरावर प्रावीण्य मिळविलेल्या खेळाडूंसाठी भिवंडी पालिकेच्या वतीने २० जून रोजी सकाळी १० ते सायंकाळी साडेचारदरम्यान कोंबडपाडा स्व. राजय्या गाजेंगी सभागृहात मार्गदर्शनपर शिबिर होणार आहे. या शिबिरात पालिका आयुक्त अनमोल सागर, सचिव महाराष्ट्र राज्य बॅडमिंटन असोसिएशनचे सचिव श्रीकांत वाड, आहारतज्ज्ञ डॉ. धनंजय मोरे, क्रीडा मानसोपचारतज्ज्ञ डॉ. राधिका धारप, क्रीडा फिजिओथेरिपिस्ट डॉ. शरयू एस खेळाडूंना मार्गदर्शन करणार आहेत. या शिबिरातून खेळामध्ये प्रगती होण्याकरिता फायदेशीर ठरणार असून खेळाडूंसाठी एक रणनीती ठरविण्यासाठी उपयुक्त दिशा मिळणार आहे. तरी या क्रीडा मार्गदर्शन शिबिरामध्ये खेळाडूंनी सहभागी व्हावे, असे आवाहन क्रीडा विभागाचे प्रमुख मिलिंद पळसुले यांनी केले आहे.