शहापूर, ता. १९ (वार्ताहर) : पुणे जिल्ह्यातील कुंडमाळ येथे इंद्रायणी नदीवरील पूल कोसळल्यानंतर ठाणे जिल्हा प्रशासन सतर्क झाले आहे. याच अनुषंगाने जिल्ह्यातील सर्वच पुलांची स्थिती तपासली जात असून, शहापूर तालुक्यातील भातसा नदीवरील सापगाव तसेच वासिंदजवळील गेरसे पुलाच्या सध्यःस्थितीचा अहवाल जिल्हा प्रशासनाकडे पाठवण्यात येणार आहे.
पावसाळा सुरू झाल्याने नद्यांना पूर येण्याची शक्यता असते. अशा परिस्थितीत नद्यांवरील पुलांची तपासणी केली जाते. मान्सूनपूर्व काळात या पुलांची तपासणी करून पुलांच्या संरचनात्मक परीक्षणाचा अहवाल जिल्हा आपत्ती व्यवस्थापन विभागाकडे सादर करावा, असे आदेश संबंधित विभागांना देण्यात आले आहेत. त्यानुसार सावरोली पुलावरील वाडा, शहापूर तालुक्यातून होणारी वाहतूक बंद करण्यात आली आहे. तर भातसा नदीवरील सापगाव येथील पूल सुमारे १५० वर्षांपूर्वीचा असून, सात वर्षांपूर्वी काँक्रीटचे अस्तरीकरण करण्यात आले होते. नदीला येणाऱ्या पुरामुळे हा पूलदेखील धोकादायक बनला आहे. त्यानुसार या पुलाची तपासणी करण्यात येणार असल्याची माहिती रस्ते विकास महामंडळाचे कार्यकारी अभियंता मुख्तार शेख यांनी दिली. तसेच भातसा नदीवरील वासिंद येथील गेरसे गावाजवळील पूलदेखील धोकादायक बनल्याने स्ट्रक्चरल ऑडिटसाठी त्याची पाहणी सार्वजनिक बांधकाम विभागाच्या अधिकाऱ्यांनी केली आहे. त्याचा अहवाल जिल्हा प्रशासनाला देण्यात येणार असल्याचे उपअभियंता मदन पवार यांनी सांगितले.
-------------------------------------
सापगावजवळील भातसा नदीवरील पुलाचे आयुष्यमान संपुष्टात आल्याचे दिसते. हा पूल वाहतुकीसाठी धोकादायक बनला आहे. त्यामुळे या पुलाचे बांधकाम परीक्षण करण्याची मागणी संबंधित विभागाकडे केली आहे.
- सुरेश म्हात्रे, खासदार
--------------------------------
शहापूर तालुक्यातील पुलांच्या पाहणीचे वरिष्ठांचे आदेश आहेत. आवश्यक तेथे उपाययोजना करण्यात येणार आहेत. सावरोली पुलाला तडे गेल्याने वाडा-वासिंद मार्गावरील वाहतूक बंद केली आहे.
- बळवंत कांबळे, उपअभियंता, सार्वजनिक बांधकाम विभाग, शहापूर