वाडा, ता. १९ (बातमीदार) : तालुक्यात गेल्या दोन दिवसांपासून सतत पडत असलेल्या मुसळधार पावसामुळे नद्या, नाल्यांना पूर आला असून, नागरिकांचे जनजीवन विस्कळित झाले आहे. मुसळधार पावसात भिवंडी-वाडा महामार्गावरील नेहरोली येथे रस्ता खचल्याने वाहतूक ठप्प, तर घोडविंदे पुलावरून पाणी जात असल्याने येथील पाड्यांचा संपर्क तुटला आहे.

गेले दोन दिवस तालुक्यात मुसळधार पाऊस पडत आहे. भिवंडी-वाडा महामार्गावरील नेहरोली येथे रस्ता खचल्याने येथे वाहतूक ठप्प झाली आहे. परिणामी वाहने पर्यायी मार्गावरून वळवण्यात आली आहेत. कळमखांड येथे एक झाड रस्त्यावर पडल्याने येथील वाहतूक काही काळ बंद होती. प्रशासनाकडून झाड हटवण्याचे काम सुरू होते. घोडविंदे पाडा येथील नाल्याला पूर आल्याने पुलावरून पाणी जात असल्याने येथील पाड्यांचा संपर्क तुटला आहे. घोणसई ग्रामपंचायतीच्या वतीने येथे कर्मचारी तैनात करून नागरिकांना पुलावरून जाण्यास मज्जाव केला जात आहे. दरम्यान, तालुक्यात अतिदक्षतेचा इशारा जाहीर केला असून, घराबाहेर न पडण्याचे आवाहन करण्यात आले आहे.

भिवंडी-वाडा खचलेला रस्ता व कळमखांड येथे पडलेले झाड या दोन बाबी वगळता तालुक्यात अन्य नुकसान झाले नसल्याची माहिती तहसीलदार भाऊसाहेब अंधारे यांनी दिली आहे. प्रशासन लक्ष ठेवून असल्याचे त्यांनी सांगितले.