अलिबाग, ता. १९ (बार्ताहर)ः तालुक्यातील धेरंड- शहापूर येथील शेतकऱ्यांनी भूसंपादन प्रक्रियेविरोधात हरकती नोंदवण्यासाठी गुरुवारी (ता. १९) उपविभागीय कार्यालयात धडक दिली. धेरंड-शहापूर येथे होऊ घातलेल्या औद्योगिक क्षेत्रासाठी रस्ता तयार करण्यात येणार असून भूसंपादनासाठी प्रशासनाकडून अंतिम नोटीस बजावण्यात आली आहे; मात्र याला स्थानिक प्रकल्पग्रस्त शेतकऱ्यांनी विरोध दर्शवला असून हरकतींचे निवेदन भूसंपादन अधिकारी तथा उपविभागीय अधिकारी यांना सादर करण्यात आले आहे.
शहापूर-धेरंड औद्योगिक क्षेत्र फेज दोनकरिता सुमारे ७३६ हेक्टर भूसंपादनाची अधिसूचना काढली होती. त्‍यानंतर महाराष्ट्र औद्योगिक विकास अधिनियम कायद्यांतर्गत बाधित शेतकऱ्यांना नोटिसा देण्यात आल्या. केवळ प्रकल्‍पापर्यंत जाणाऱ्या रस्त्याकरिता सरकारकडून अंतिम निवाड्याची नोटीस देण्यात आल्‍याचा आरोप शेतकऱ्यांकडून करण्यात येत आहे.
२०१९ मध्ये पहिल्‍यांदा प्रकल्पग्रस्त शेतकऱ्यांना भूसंपादनासाठी नोटीस पाठविण्यात आली होती. यानंतर जिल्हाधिकाऱ्यांनी भूसंपादनासंदर्भात बैठक आयोजित केली असता शेतकऱ्यांनी विरोध दर्शवला. २०२१ मध्ये सक्तीचे भूसंपादन करण्याच्या नोटिसा शेतकऱ्यांना प्राप्त झाल्या. सरकारने भूसंपादन करताना निश्चित केलेला दर शेतकऱ्यांना मान्य नाही. त्याचप्रमाणे महाराष्ट्र औद्योगिक विकास अधिनियमात असणाऱ्या तरतुदीनुसार संपादित केलेल्या ठिकाणी १५ टक्के विकसित भूखंड व प्रत्येक वारसाला प्रकल्पामध्ये नोकरी व इतर फायदे मिळणे आवश्यक आहे. असे असतानाही सरकारने ठोस भूमिका अद्याप मांडलेली नाही. बाधित शेतकऱ्यांनी मुंबई उच्च न्यायालयात याचिकाही दाखल केली आहे.
नियोजित जमिनीमध्ये अनेक बाधित शेतकऱ्यांची शेतघरे, शेततळी, गुराढोरांचे गोठे, झाडे आहेत. स्थानिक शेतकरी यामधून शेतपिकाव्यतिरिक्त पूरक उत्पन्न घेतात. शहापूर-धेरंड परिसरात जिताडे, खेकडे, कोळंबी आदी माशांचे उत्पादन मोठ्या प्रमाणात घेतले जाते. भूसंपादनामुळे हा व्यवसाय पूर्णपणे लयास जाणार आहे. याबाबत सरकारने नुकसानभरपाईबाबत कोणतीही भूमिका स्पष्ट केली नाही.
वारसा हक्‍काने नोकऱ्यांची मागणी
बाधित शेतकऱ्यांच्या मुलांना व्यवसायाच्या आवश्यकतेनुसार प्रशिक्षण देऊन कायमस्वरूपी वारसाहक्काने त्वरित नोकरीत सामावून घ्‍यावे, भूसंपादनाची प्रक्रिया पूर्ण झाल्यानंतर प्रकल्प उभारणीच्या कालावधीत प्रकल्पग्रस्तांना नुकसानभरपाई देण्यात यावी व भूमिहीन असल्‍याचा शेतकऱ्यांना दाखला देण्यात यावा, अशा मागण्या या वेळी करण्यात आल्या.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.