भिवंडी (वार्ताहर)ः महापालिका क्षेत्रातील टोरंट पॉवर कंपनीकडून वीज वितरण केल्या जाणाऱ्या वीज ग्राहकांना वीज देयकांसोबतच अतिरिक्त सुरक्षा रक्कम भरण्याबाबतचे पत्र दिले गेले आहे. परंतु वीज ग्राहकांनी अतिरिक्त सुरक्षा रक्कम भरू नये, असे आवाहन भिवंडी लोकसभेचे खासदार सुरेश म्हात्रे यांनी निवेदनाद्वारे केले आहे. कोणत्याही विभागाकडून किंवा टोरंटच्या अधिकाऱ्यांकडून अनामत रक्कम भरण्यासाठी जबरदस्तीने केल्यास माझ्याशी वैयक्तिक संपर्क साधावा, असे सांगितले. याबाबत टोरंट पॉवर कंपनीशी संपर्क साधला असता, त्यांनी सुरक्षा अनामत रक्कम ही महावितरणच्या नियमानुसार व महाराष्ट्र राज्य वीज नियामक आयोगाच्या पुरवठा संहिता नियम २०२१ च्या अनुषंगाने घेण्याचे निर्देश आहेत, अशी माहिती जनसंपर्क अधिकारी चेतन बदयानी यांनी दिली आहे.