वज्रेश्वरी, ता.२१(बातमीदार): समग्र शिक्षा गट साधन केंद्र आणि भिवंडी पंचायत समितीच्या शिक्षण विभागाच्या माध्यमातून तालुकास्तरीय योग प्रशिक्षण कार्यशाळा नुकतीच भिवंडीतील घोळगाव, सोनाळे येथे पार पडली. या शिबिरात तालुकास्तरावरील जिल्हा परिषद शाळेच्या २५ केंद्रातील ५० शिक्षकांना योग प्रशिक्षण देण्यात आले.
शहापूर तालुक्यातील प्राथमिक शिक्षक योग गुरू प्रमोद शिंदे सर प्रमुख योग मार्गदर्शक म्हणून उपस्थित होते. त्यांनी पद्मासन, वज्रासन, ताडासन, भुजंगासन, अर्धवक्रासन, वृक्षासन, शवासन, मकरासन अशी आसने प्रशिक्षणार्थ्यांकडून करून घेतली. त्याचप्रमाणे शीर्षासन, अर्ध शीर्षासन, वक्र शीर्षासन विविध शुद्धी क्रिया, कपालभारतीचे सर्व प्रकार प्रात्यक्षिकांमधून दाखवण्यात आली. यावेळी भिवंडी गटाचे गटशिक्षणाधिकारी संजय असवले यांनी विविध आसने करून दाखविले. यावेळी ठाणे डायट प्राचार्य डॉ. संजय वाघ, समग्र शिक्षाच्या गटसमन्वयिका तथा शिक्षण विस्तार अधिकारी वैशाली डोंगरे उपस्थित होत्या.