जुईनगर, ता. २१ (बातमीदार) : नवी मुंबई महापालिकेकडून कृषी उत्पन्न बाजार समितीला एकामागे एक धक्के देणे सुरू आहे. बाजारातील इमारती अतिधोकादायक ठरवूनही त्या खाली करण्यात आल्या नाहीत. त्यामुळे मॅफ्को, मसाला बाजारामधील मध्यवर्ती सुविधा इमारतीनंतर शुक्रवारी (ता. २०) रात्रीपासून कांदा-बटाटा बाजारातील पाणीपुरवठा महापालिकेकडून खंडित करण्यात आला आहे.
एपीएमसीतील कांदा-बटाटा बाजारासह तीन ते चार इमारती अतिधोकादायक असल्याचे पालिकेकडून घोषित करण्यात आल्या आहेत. दरवर्षी संबंधित व्यापारी आणि बाजार समितीला पालिका प्रशासनाकडून नोटीस देण्यात येते; मात्र या इमारती व्यापारी आणि तत्सम कार्यालय चालकांकडून खाली केल्या जात नव्हत्या. परिणामी, मोठी दुर्घटना घडण्याची शक्यता निर्माण झाली होती. शिवाय यंदा पावसाळ्याच्या सुरुवातीलाच नवी मुंबई परिसरात काही ठिकाणी दुर्घटना घडल्याने बाजार समिती प्रशासनासह महापालिका सतर्क झाली आहे. भविष्यातील प्रचंड मोठी दुर्घटना आणि जीवितहानी टाळावी, या अनुषंगाने बाजार समितीमध्ये कारवाईचा धडाका सुरू असल्याचे सांगण्यात येत आहे. लवकरच महावितरणही वीजपुरवठा खंडित करणार असल्याचे बोलले जात आहे.
-------------------
भाडेतत्त्वावर व्यवसाय करणे अशक्य
एपीएमसीतील व्यापारी आणि संबंधित व्यवसायिक प्रचंड अस्वस्थ झाले आहेत. बाजार समिती प्रशासनाने पर्यायी जागा न देता कारवाई केल्याने तत्सम कार्यालय व्यावसायिक व व्यापाऱ्यांचे नुकसान होणार असल्याचे बोलले जात आहे. परिसरात दुसऱ्या ठिकाणी भाडेतत्त्वावर व्यवसाय करणे शक्य नसल्याचे व्यापाऱ्यांकडून सांगण्यात येत आहे.
---------------------
सर्व व्यापारी बाजार समितीला लाखो रुपये कर देतात. बाजार समितीने मार्केटची पुनर्बांधणी करावी म्हणून न्यायालयात लढाई सुरू आहे; मात्र संचालकांसह काही राजकीय लोक नवीन बाजार होऊ नये, अशा मानसिकतेत आहेत. त्यामुळे येथील व्यापाऱ्यांचे हाल होत असून पालिकेने पाणी कापल्याने आम्हाला कालपासून पाण्याविना बाजारात राहायला लागत आहे.
- मनोहर तोतलानी, व्यापारी, कांदा-बटाटा बाजार