अलिबाग, ता. २२ (वार्ताहर)ः पोलिसांबाबत लहान मुलांच्या मनातील भीती, दडपण घालवून त्यांना बोलते करण्यासाठी, घडलेल्या प्रसंगाची नेमकी माहिती मिळवण्यासाठी प्रत्येक पोलिस ठाण्यात बालस्नेही कक्ष स्थापन करण्याचा निर्णय राज्य सरकारने घेतला होता. त्यानुसार राज्यातील अनेक पोलिस ठाण्यात बालस्नेही कक्ष स्थापन करण्यात आले आहेत; मात्र रायगड जिल्ह्यातील २८ पोलिस ठाण्यांपैकी केवळ तीन पोलिस ठाण्यांत बालस्नेही कक्ष स्थापन करण्यात आला आहे. २०२४-२५ या वर्षांत ४५ बालकांचे समुपदेशन करण्यात आले आहे.
कोंदट, भीतीदायक वातावरणामुळे भल्याभल्यांची पोलिस ठाण्याची पायरी चढताना भंबेरी उडते. मग निरागस, लहान मुलांच्या मनात काय घालमेल होत असावी, हे सांगण्याची गरज नाही. काही मुले गुन्हा, अपघाताची प्रत्यक्षदर्शी, महत्त्वाचे साक्षीदार असतात. काही अत्याचारग्रस्त असतात, तर काही गुन्हेगार. सर्व परिस्थितीत त्यांच्याकडून इत्थंभूत माहिती मिळवणेही गरजेचे असते; मात्र लहान वयातच मुलांना पोलिसांची भीती घातली जाते. यामुळे साक्षीदार म्हणून मुले जेव्हा पोलिसांना सामोरे जातात, तेव्हा ती दडपणाखाली असतात. त्यांना बोलते करणे अवघड होते. समुपदेशकांची मदत घ्यावी लागते. या सर्व बाबींचा विचार करून पोलिस ठाण्यात बालस्नेही कक्ष उभारण्यात आला आहे.
रायगड जिल्ह्यातील २८ पोलिस ठाण्यांपैकी केवळ खोपोली, रोहा व अलिबाग या तीन पोलिस ठाण्यांत बालस्नेही कक्ष स्थापन करण्यात आला आहे. वर्षभरात ४५ बालकांचे समुपदेशन करण्यात आले आहे.
रायगड जिल्हा औद्योगिक जिल्हा असल्याने या ठिकाणी विविध प्रकारचे गुन्हे घडत असतात. कौटुंबिक हिंसाचाराचे प्रकारही घडत असतात. अशा वेळी काही मुले गुन्हा, अपघाताची प्रत्यक्षदर्शी, महत्त्वाचे साक्षीदार असतात. काही अत्याचारग्रस्त असतात. अशा वेळी या मुलांकडून गुन्ह्याची किंवा गुन्हेगारांची माहिती मिळविणे अनेकदा कठीण होते. अशा वेळी बालस्नेही कक्षाची मदत घेतली जाते. त्यामुळे ठिकाठिकाणी बालस्नेही कक्षाची स्थापना करणे गरजेचे ठरत आहे.

सध्या जिल्ह्यात तीन ठिकाणी बालस्नेही कक्ष सुरू असून आम्ही एका एनजीओशी यासंदर्भात चर्चा करीत आहोत. प्रथम तालुक्याप्रमाणे त्यानंतर प्रत्येक पोलिस ठाण्यात बालस्नेही कक्ष उभारण्यासाठी प्रयत्नशील आहोत. याबाबत लवकरच कार्यवाही सुरू करण्यात येणार आहे.
- आचल दलाल, जिल्हा पोलिस अधीक्षक, रायगड

कक्षाचा उद्देश
१. बालस्नेही कक्ष मुलांसाठी पोलिस अधिकाऱ्यांशी बोलण्यासाठी एक सुरक्षित आणि आरामदायी ठिकाण बनविणे.
२. मुलांच्या मनातील पोलिसांची भीती काढणे, जेणेकरून ते त्यांचे विचार, माहिती उघडपणे व्यक्त करू शकतील.
३. बालस्‍नेही कक्ष गरजू मुलांना कायदेशीर मदत आणि मार्गदर्शन करण्याचे एक साधनही आहे.