ठाणे शहर, ता. २३ ः कोरोनाच्या काळात हवेत ऑक्सिजनची निर्मिती करणाऱ्या झाडाझुडपांच्या लागवडीकडे अनेकांचा कल वाढला होता. ठाणे जिल्हाधिकारी कार्यालयानेदेखील लाखो रुपयांचा खर्च करून कार्यालयाच्या प्रवेशद्वाराजवळ ‘दीर्घायु ऑक्सि झोन’ तयार केला होता, मात्र पर्यावरणाच्या दृष्टीने महत्त्वाचा उपक्रमच गुंडाळण्यात आल्याने आश्चर्य व्यक्त केले जात आहे.
कोरोनाचा काळ सगळ्यांसाठी अतिशय जोखमीचा होता. लाखोंचे जीव या विषाणूमुळे गेले होते. अशातच राज्यात पुन्हा कोरोनाचा शिरकाव झाला आहे. त्यामुळे पुन्हा एकदा लोकांना ऑक्सिजनचे महत्त्व जाणवू लागले आहे. याच अनुषंगाने विविध झाडांची लागवड केली जात आहे, पण ठाणे जिल्हाधिकारी कार्यालयाने तयार केलेला ‘दीर्घायु ऑक्सि झोन’ आता बंद करण्यात आला आहे. कोरोनाच्या काळात ठाणे जिल्हाधिकारी कार्यालयाच्या आवारात, मुख्य गेटसमोर साधारण ६५० चौरस फूट जागेत हा झोन बांधण्यात आला होता. या ठिकाणी स्नेक प्लांट, अलो व्हेरा, कृष्ण तुळस, एरिका पाम, ग्रीन मनी प्लांट यासारख्या ऑक्सिजन देणाऱ्या झाडांची लागवड करण्यात आली होती. या उद्यानात एखादी व्यक्ती केवळ १५ ते २० मिनिटे जरी बसली तरी तिच्या शरीरातील ऑक्सिजनची पातळी ८० ते ९० टक्के वाढत असल्याचा दावा करण्यात आला होता, पण जिल्हाधिकारी प्रशासनाने हे उद्यान काढून टाकले असून, पर्यावरणाप्रतीचे प्रेम बासनात गुंडाळल्याचे चित्र आहे.
-----------------------------------------
विदेशातून झाडांची आयात
२०१९-२० मध्ये ‘दीर्घायु ऑक्सि’ झोन तयार करण्यात आला होता. यामध्ये लावण्यात आलेली तुळस श्रीलंकेमधून आणण्यात आली होती, तर कोरफड इजिप्तमधून आणण्यात आला होता. येथे लावलेली झाडे २४ तास शंभर टक्के ऑक्सिजन देत होते. या झोनकरिता ठाणे वन विभागाचे मोलाचे सहकार्य मिळाले होते. कमी खर्चात आणि शून्य देखभालीच्या खर्चात ऑक्सिजननिर्मिती केली जात होती.
-------------------------------------------
प्राणवायूनिर्मितीला बगल
तत्कालीन ठाणे जिल्हाधिकारी राजेश नार्वेकर यांच्या कार्यकाळात झोन तयार करण्यात आला होता. हृदयाचे ठोकेसुद्धा नियमित होतात, शरीराला शुद्ध हवेचा पुरवठा होतो. रक्ताभिसरण नियमित होऊन रक्तपुरवठ्याचे प्रमाण वाढते, असा दावा डॉ. अश्विनी कोटकर यांनी हा झोन तयार करताना केला होता, परंतु कोरोनाचा काळ संपताच लोकांना प्राणवायू देणारी ही बाग तोडण्यात आली आहे.