तांदूळवाडी येथे पणनविषयक एकदिवसीय कार्यशाळा उत्साहात
मनोर, ता. २३ : कृषी पणन मंडळ, पुणे व तळेगाव दाभाडे येथील राष्ट्रीय सुगी पश्चात तंत्रज्ञान संस्थेच्या संयुक्त विद्यमाने आयोजित जिल्ह्यातील कृषी उत्पन्न बाजार समितीचे सभापती, उपसभापती, संचालक मंडळ व सचिवांची पणनविषयक एकदिवसीय कार्यशाळा पार पडली. पालघर तालुक्याच्या पूर्वेकडील तांदूळवाडी येथे कार्यशाळेचे आयोजन केले होते.
कार्यशाळेत बाजार समिती फीचा उपयोग, केंद्र शासनाच्या कृषी बाजार सुधारणांकरिता असणाऱ्या योजना, कृषी उत्पादने, बाजार समिती गुणांक पद्धती, कृषी पणनविषयक विविध योजना, स्मार्ट एपीएमसी, बाजार सुधारणा व त्यांचा बाजार समितीवर झालेला परिणाम, खासगी क्षेत्रातील आव्हाने तसेच उपाययोजनांबाबतची माहिती तज्ज्ञांकडून देण्यात आली.
जिल्हा उपनिबंधक शिरीष कुलकर्णी, पणन अधिकार दीपिका दीक्षित आणि प्रकल्प सहाय्यक तुषार जंगम, जिल्हा अधीक्षक कृषी अधिकारी संगीता माने, जिल्हा उपनिबंधक शुद्धोधन कांबळे, जिल्हा सल्लागार अजय आटे, पणन अधिकारी प्रतिमा सिंग यांनी यावेळी मार्गदर्शन केले, तर राष्ट्रीय सुगी पश्चात तंत्रज्ञान संस्थेचे व्यवस्थापक विश्वास जाधव यांनी संस्थेमधील विविध प्रशिक्षण कार्यक्रमासंबंधी माहिती दिली.
कार्यशाळेच्या आयोजनात उप सरव्यवस्थापक अजय कडू, राष्ट्रीय सुगी पश्चात तंत्रज्ञान संस्थेचे व्यवस्थापक विश्वास जाधव, सहाय्यक व्यवस्थापक संतोष डोईफोडे, गिरीष गर्जीगे आणि कृषी उत्पन्न बाजार समितीचे संचालक राजेंद्र पाटील यांनी सहकार्य केले.