बदलापूर, ता. २३ (बातमीदार) : बदलापूर आणि आजूबाजूच्या परिसरातून सोनसाखळी, दुचाकी चोरी करणाऱ्या तुषार ऊर्फ प्रेम व्यंकटेश ढगे (वय २३) या सराईत चोराच्या उल्हासनगर गुन्हे शाखेने मुसक्या आवळल्या आहेत. अटक केल्यानंतर ढगे याच्याकडून पावणे दोन लाखांचा चोरी केलेला मुद्देमाल हस्तगत करण्यात आला.
बदलापूर व आजूबाजूच्या परिसरातून सोनसाखळी व दुचाकीची चोरी करणारा तुषार हा बदलापुरात लपून बसल्याची माहिती मिळताच पोलिस निरीक्षक प्रवीण खोचरे आणि संपूर्ण पथकाने दोन पंचासमक्ष त्या‍ला ताब्यात घेतले. त्याच्याकडून १५ ग्राम वजनाचे सोन्याचे मंगळसूत्र, तीन दुचाकी असा एकूण एक लाख ६४ हजार रुपयांचा मुद्देमाल हस्तगत करण्यात आला. त्यानंतर त्याला पुढील कारवाईसाठी बदलापूर पश्चिम पोलिस ठाण्यात हजर करण्यात आले. तुषारवर यापूर्वी मालमत्ता, जबरी चोरी, घरफोडी, दुचाकी चोरी असे एकूण १५ गुन्हे दाखल आहेत. त्या‍ला अटक करण्यासाठी पोलिस निरीक्षक प्रवीण खोचरे, हवालदार शेखर भावेकर, सुरेश जाधव, कॉन्स्टेबल रेवणनाथ शेकडे यांच्या टीमने कामगिरी केली.