कासा, ता. २३ (बातमीदार) : गेल्या काही दिवसांपासून वीजपुरवठा सातत्याने खंडित होत असल्याने दररोज हातावर पोट घेऊन जगणाऱ्या रिक्षाचालकांवर उपासमारीचे संकट कोसळले आहे. गेल्या काही दिवसांपासून अनेक रिक्षाचालक सकाळी सीएनजी भरण्यासाठी पंपावर जातात, पण तेथे वीजपुरवठा खंडित असल्याने सात ते आठ तास रांगेत उभे राहूनसुद्धा सीएनजी मिळत नाही. त्यामुळे अनेक चालक दिवसभर रिक्षा चालवू शकत नाहीत. त्यामुळे त्यांचा धंदा होत नसल्यामुळे अनेकांवर उपासमारीचे संकट कोसळले आहे.

अनेक बेरोजगार गरिबांनी रिक्षा विकत घेतल्या आहेत. त्यात सीएनजी रिक्षाचे प्रमाण मोठे आहे. रिक्षाचालकांनी कर्ज काढून रिक्षा घेतल्या असल्याने हप्ता कसा भरायचा, या विवंचनेत आहेत. त्यात सध्या शाळा, महाविद्यालये सुरू झाल्याने अनेक विद्यार्थ्यांची ने-आण करणे, यासाठी रिक्षा लावलेल्या होत्या, पण विजेचा खोळंबा होत असल्याने सीएनजी वेळेवर मिळत नसल्याने आर्थिक विवंचना सुरू झाली आहे.

गेल्या काही दिवसांपासून कासा, चारोटी परिसरात वीजपुरवठा खंडित होत आहे. सीएनजी पंपावर डहाणू, तलवाडा, तवा, महालक्ष्मी, सायवन येथील जवळपास ६० ते ७० खेडो-पाड्यांतील रिक्षाचालक इंधन भरण्यासाठी येतात. रोज प्रवासी रिक्षा धंद्यावर आपला उदरनिर्वाह करणाऱ्या रिक्षाचालकांच्या पोटा-पाण्याचा प्रश्न निर्माण झाला आहे. आमच्या रिक्षा सीएनजीवर चालत असल्याने दररोज सीएनजी पंपावर यावे लागते, पण येथे नेहमीच कधी वीज नसते, तर कधी सीएनजीची कमतरता असल्याने खूप वेळ रांगेमध्ये राहावे लागते, असे सांगण्यात आले.

सीएनजी पंपालाही फटका
वीजपुरवठा सुरू नसल्याने पंप सुरू करता येत नाही आणि जनरेटर लावल्यास मोठ्या प्रमाणात आर्थिक फटका आम्हाला बसत आहे, असे सीएनजी पंपावरील कर्मचारी विकास सिंग यांनी सांगितले.

कर्जाचे हप्ते कसे फेडावे?
गेल्या आठवड्यापासून रिक्षाचालकांवर मोठे संकट कोसळले आहे. आम्ही कर्ज काढून रिक्षा घेऊन ती चालवत असून, त्यावर आमचा संसार चालू असतो, पण गेल्या काही दिवसांत वीज नसल्याने इंधन वेळेवर मिळत नाही. त्यामुळे आर्थिक टंचाईला तोंड द्यावे लागत आहे. याप्रकरणी सरकारने काही उपाययोजना करावी, अशी मागणी गंजाड येथील रिक्षाचालक संघटनेचे अध्यक्ष किरण पराड यांनी दिली.