अंबरनाथ, ता. २३ (बातमीदार) : अंबरनाथमध्ये नगरपथविक्रेता समिती सदस्यांच्या निवडणुकीचा कार्यक्रम जाहीर केला आहे. आठ नगरपथविक्रेत्यांची समिती सदस्य पदासाठी निवडणूक होणार आहे. उपजीविका संरक्षण आणि पथविक्री अधिनियमानुसार राज्याच्या कामगार आयुक्तांच्या आदेशानुसार अंबरनाथमध्ये प्रथमच निवडणूक होणार आहे. निवडून येणाऱ्या आठ सदस्यांमध्ये सर्वसाधारण प्रवर्गासाठी तीन आणि अनुसूचित जाती-जमाती, इतर मागासवर्ग, अल्पसंख्याक आणि विकलांग; तसेच दिव्यांग प्रवर्गासाठी प्रत्येकी एका सदस्याची निवडणूक होणार आहे. याबाबतची जाहिरात प्रसिद्ध केली असून निवडणुकीचा कार्यक्रम जाहीर केला आहे.
अंबरनाथ शहरात १२८३ फेरीवाल्यांची नोंदणी झाली आहे. २०२३ ला याबाबतचा सर्व्हे पूर्ण झाल्याची माहिती प्रशासनातर्फे देण्यात आली. नगरपथविक्रेता समिती सदस्यांच्या निवडणुकीचा कार्यक्रम जाहीर झाला असून शुक्रवारी (ता. २७) दुपारी २ वाजता नामनिर्देशन पत्रे वाटप करण्यात येणार आहे. तर ३० जून ते ३ जुलैपर्यंत ११ ते ५ या दरम्यान स्वीकारले जातील. नामनिर्देशन पत्रांची छाननी ४ जुलैला सकाळी ११ वाजता होणार आहे. नामनिर्देशन पत्रांची यादी त्याच दिवशी छाननी झाल्यानंतर होईल. तर यादी सोमवार ७ जुलैला सायंकाळी ५ वाजल्यानंतर प्रसिद्ध केली जाणार आहे. नामनिर्देशन पत्र माघार घेण्याची मुदत त्याच दिवशी राहणार आहे. मुरबाड नगरपंचायतचे मुख्याधिकारी मनोज म्हसे निवडणूक निर्णय अधिकारी म्हणून काम पाहणार आहेत.
निवडणूक निर्णय अधिकारी उमेदवारांची नावे घोषित करतील आणि नगरपथविक्रेता समितीमध्ये असे सदस्य निवडून आल्याचे जाहीर करणार आहेत. मतदानाची आवश्यकता भासल्यास १४ जुलैला सकाळी ८ ते दुपारी ३ वाजेपर्यंत मतदान घेण्यात येणार आहे. मतदान झाल्यानंतर त्याच दिवशी निकाल जाहीर करण्यात येणार आहे.

नियम व अटी
इच्छुक उमेदवारांचे नाव नगरपालिकेने प्रसिद्ध केलेल्या पथविक्रेत्यांच्या अंतिम यादीत असणे आवश्यक आहे. उमेदवारांच्या नावे नगरपालिकेची कोणत्याही प्रकारची थकबाकी येणे असता कामा नये, त्याबाबतचा ना-हरकत दाखल्याची प्रत जोडणे बंधनकारक आहे. उमेदवार राखीव प्रवर्गातून निडणूक लढवणार असल्याच्या त्याच्याकडे संबंधित सक्षम प्राधिकरणाकडून दाखला देण्याची अट आहे.