वासुंद्री मुख्य रस्ता खड्डेमय

टिटवाळा, ता. २५ (वार्ताहर) ः कल्याण-डोंबिवली महापालिका क्षेत्रातील रस्ते खड्डेमय झाले आहेत. त्यामुळे नागरिक, वाहनचालकांना अनेक गैरसोयींचा सामना करावा लागत आहे. मांडा-टिटवाळा पश्चिम येथील वासुंद्री मुख्य रस्त्यावरील गणेश प्रतिमा सोसायटीसमोर असाच एक भीषण खड्डा पडला आहे. या खड्ड्यामुळे दुचाकीस्वार आणि रिक्षाचालकांसाठी अपघाताचा धोका निर्माण झाला आहे. दररोज हजारो विद्यार्थी, महिला, ज्येष्ठ नागरिक या मार्गावरून प्रवास करतात. रस्त्यालगतच शाळा, बाजारपेठ आणि शाळेच्या बसचे थांबे असल्याने येथे मोठी वर्दळ असते; मात्र या खड्ड्यात चाक अडकल्याने अनेकदा वाहनांचे अपघात होतात.

सर्वात गंभीर बाब म्हणजे, या ठिकाणी सतत अपघात घडत असतानाही कल्याण-डोंबिवली महापालिका किंवा सार्वजनिक बांधकाम विभागाने अद्याप कोणतीही ठोस कारवाई केलेली नाही. नागरिकांनी वेळोवेळी तक्रारी करूनही प्रशासनाचे याकडे अक्षम्य दुर्लक्ष होत आहे. अपघात होऊ नयेत, यासाठी स्थानिकांनी खड्ड्यात झाडांच्या फांद्या आणि लाल कापड लावले होते.

कल्याण-डोंबिवली महापालिका एकीकडे स्मार्ट सिटी प्रकल्पांतर्गत इंग्रजी शाळा, डिजिटल शिक्षण, रस्त्यांचे सक्षमीकरण अशा घोषणा करत आहे; मात्र दुसरीकडे वासुंद्री रस्त्यासारख्या मुख्य मार्गावर प्रचंड खड्डा पडल्यानंतरही त्याकडे दुर्लक्ष होत आहे. त्यामुळे संतप्त नागरिकांनी प्रशासनाला आंदोलनाचा इशारा दिला आहे. तातडीने या खड्ड्यांची डागडुजी केली नाही, तर महापालिका कार्यालयासमोर आंदोलन, रास्ता रोको आणि तीव्र निदर्शने करण्यात येतील, असा इशारा संतप्त नागरिकांनी दिला आहे.