अलिबाग, ता. २५ (वार्ताहर)ः कृषी व्यवसायासाठी ड्रोन तंत्रज्ञानाचा वापर औषध फवारणीसारख्या उपक्रमांद्वारे वाढवण्यात येणार आहे. त्यासाठी शेतकऱ्यांचा मेळावा घेऊन त्यांना ड्रोनच्या माध्यमातून औषध फवारणीचे फायदे सांगून भविष्यात आंबा, काजू उत्पादनात वाढ करण्यावर भर दिला जाईल, असे मार्गदर्शन जिल्‍हाधिकारी किशन जावळे यांनी केले.
अलिबागमधील जिल्हा उद्योग केंद्र व महाराष्ट्र उद्योजकता विकास केंद्राच्या संयुक्त विद्यमाने ड्रोन आधारित प्रणाली व सीसीटीव्ही कॅमेरा देखभाल आणि दुरुस्ती प्रशिक्षणाचे आयोजन करण्यात आले होते. कार्यक्रमाचा शुभारंभ मंगळवारी (ता. २४) जिल्हाधिकारी किशन जावळे यांच्या प्रमुख उपस्थितीत झाला. कार्यक्रमाला बँक ऑफ इंडियाचे व्यवस्थापक विजयकुमार कुलकर्णी, जिल्हा उद्योग केंद्र महाव्यवस्थापक जी. एस. हरळय्या, बँक ऑफ बडोदाचे व्यवस्थापक चैतन्य मुड, स्टेट बँक ऑफ इंडियाचे जिल्हा समन्वयक संजय गोळे उपस्थित होते.
सीसीटीव्ही कॅमेरे दुरुस्ती प्रशिक्षणाच्या माध्यमातून तरुणांना रोजगाराच्या संधी मिळणार आहेत. तसेच ड्रोन आणि सीसीटीव्ही क्षेत्रात मोठ्या प्रमाणावर उद्योग संधी असून, जिल्हा प्रशासन या क्षेत्रांतील प्रशिक्षण व प्रोत्साहन यावर भर देत आहे, असे सांगितले.
रायगडसारख्या पर्यटन जिल्ह्यात ड्रोन आधारित उद्योग-व्यवसायासाठी भरपूर संधी आहेत. तसेच सीसीटीव्ही कॅमेऱ्यांच्या देखभाल व दुरुस्तीसाठीही भरपूर रोजगाराच्या संधी उपलब्ध आहेत. प्रशिक्षणामुळे बेरोजगार तरुणांना स्वउद्योग सुरू करण्यास मदत होणार असल्‍याचे जी. एस. हरळय्या यांनी सांगितले.

लाभार्थ्यांना फूड व्हॅनचे हस्तांतर
मुख्यमंत्री रोजगार निर्मिती कार्यक्रम व पंतप्रधान रोजगार निर्मिती कार्यक्रमांतर्गत लाभार्थ्यांना मंजूर झालेल्या फूड व्हॅनचे हस्तांतरणही जिल्हाधिकारी किशन जावळे यांच्या हस्ते करण्यात आले.
----------------------