भिवंडी, ता. २६ (वार्ताहर)ः शहर तसेच ग्रामीण भागातील रस्त्यांची दुरवस्था झाली आहे. त्यामुळे भिवंडीकरांना वाहतूक कोंडीला वारंवार सामोरे जावे लागत असल्याने ठाकरे गट आक्रमक झाला आहे.
शहरातील रस्त्यांची अवस्था दयनीय झाल्याने त्याचा परिणाम वाहतुकीवर होत आहे. या रस्त्यांकडे सार्वजनिक बांधकाम विभागाचे दुर्लक्ष होत आहे. त्यामुळे चाकरमानी, विद्यार्थी, वाहनचालक सर्वच मेटाकुटीला आले आहेत. या प्रकाराबाबत शासनाला अनेकदा निवेदने देण्यात आली आहेत; पण कोणत्याही उपाययोजना केल्या जात नसल्याने ठाकरे गटाचे जिल्हाप्रमुख मनोज गगे यांच्या नेतृत्वाखालील शिष्टमंडळाने सार्वजनिक बांधकाम विभागाचे उपअभियंता दत्तू गीते यांना निवेदन दिले आहे. या वेळी पंधरा दिवसांत उपाययोजना करून खड्डे तत्काळ बुजविण्याची मागणी करण्यात आली असून शिवसेना स्टाइलने आंदोलनाचा इशारा दिला आहे. या वेळी शिवसेना पदाधिकारी राजू पातकर, ललित राऊत, विजय कुंभार, नितीन काठवले, शंकर खामकर, जमालुद्दीन मोमीन, मुजम्मील खान, शफीक अन्सारी, मंगल मुल्ला, आबीद सय्यद, रंजित नाईक, रमेश नाईक आदी उपस्थित होते.