वसई, ता. २५ (बातमीदार)ः विठू नामाचा जयघोष, टाळमृदुगांच्या गजरात अर्नाळ्यातील कोळी बांधवांनी पंढरपूरकडे कूच केली आहे. या वारीत शेकडो ग्रामस्थ सहभागी झाले असून, २० दिवसांच्या प्रवासानंतर विठूरायाचे दर्शन घेणार आहेत.
अर्नाळा येथील कोळीवाड्यात विविध सण मोठ्या उत्साहात साजरे केले जातात. नेहमी भक्तिरसात असणारा येथील कोळीबांधव वारीत उत्साहाने सहभागी होत असतो. पंढरपूरला जाऊन विठ्ठलाचे दर्शन घेता यावे, या ओढीने शेकडो वारकरी पायी निघाले आहेत. या वेळी अर्नाळा बंदर पाडा येथील विठ्ठल मंदिरात अभिषेकानंतर कोळीवाड्यात दिंडी फिरवण्यात आली. कोळी बांधवांची कुलदेवता एकवीरा मातेचे दर्शन घेऊन ही वारी आळंदीहून पुढे पंढरपूरकडे प्रस्थान करणार आहे.