मुंब्रा प्रकरण दाबल्याचा रेल्वेवर आरोप

सकाळ वृत्तसेवा
ठाणे, ता. २५ : मुंब्रा-दिवा स्थानकादरम्यान झालेला अपघात हा प्रवाशांच्या बॅगांमुळे झाल्याचा निष्कर्ष काढून हे प्रकरण दाबण्यात येत आहे, असा आरोप मुंबई रेल्वे प्रवासी संघाने केला आहे.
मुंबईकर रेल्वे प्रवासी असेच मरत राहणार का, असा सवाल उपस्थित करीत प्रवाशांनी आणि प्रवासी संघटनांनी विचारलेल्या एकाही प्रश्नाचे उत्तर रेल्वेने दिलेले नाही, असे मत प्रवासी संघाचे उपाध्यक्ष सिद्धेश देसाई यांनी व्यक्त केले आहे. रेल्वेने दिलेल्या माहितीनुसार, प्रवाशांच्या बॅगा एकमेकींमध्ये अडकल्याने हा अपघात झाला आहे. त्यावर देसाई म्हणतात की, एक बॅग लागल्यामुळे रेल्वेचा डबा हलतो का? बॅगांमुळे इतका मोठा धक्का बसतो का? सीसीटीव्ही फुटेज मिळाले नसल्याने अपघातग्रस्तांची साक्ष महत्त्वाची ठरते आणि अनेक प्रवाशांनी ट्रेन घासल्याचे आणि मोठा आवाज झाल्याचे सांगितले आहे. मग रेल्वे त्यांना का खोटे ठरवत आहे? असे प्रश्न त्यांनी उपस्थित केले आहेत.