टोकावडे, ता. २६ (बातमीदार)ः मुरबाड तालुक्यातील उमरोली ते धसई रस्त्यावरील ओजिवले-माणगाव रस्त्यादरम्यान खड्डे तसेच वाढलेल्या झाडांमुळे प्रवाशांना जीवघेणा प्रवास करावा लागत आहे.
उमरोली (पि.) ते धसई या रस्त्यावरून मोठ्या प्रमाणात रहदारी सुरू असते. पहिले कॅशलेस गाव म्हणून प्रसिद्ध असलेल्या धसई गावात सोमवारचा आठवडा बाजार भरतो. दैनंदिन वस्तू खरेदीसाठी या बाजारात ये-जा करतात. या रस्त्यावरून अनेक विद्यार्थी, नागरिक खासगी वाहनाने तसेच एसटी बसने प्रवास करतात, मात्र गेल्या दोन ते तीन महिन्यांपासून ओजिवले-माणगावजवळील रस्ता चिकनवट माती असल्यामुळे काही ठिकाणी दबला आहे. त्यामुळे मध्यभागी मोठे खड्डे पडले असून, साचणाऱ्या पाण्यामुळे अपघात होण्याची शक्यता आहे. त्यामुळे प्रशासनाने या खड्ड्याकडे वेळीच लक्ष देऊन खड्डे तत्काळ भरावे, अशी मागणी स्थानिक नागरिक करत आहेत.
...........................
रस्त्यावरील झाडांचा धोका
उमरोली (पि.) ते ओजिवले रस्त्यावर मोठ्या प्रमाणात रहदारी सुरू असून, अनेक प्रवासी, विद्यार्थी एसटी बसने तसेच खासगी वाहनाने प्रवास करत असतात. या रस्त्यावर एक झाड पूर्णपणे झुकल्यामुळे अपघाताचा धोका निर्माण झाला आहे. याकडे प्रशासनाने वेळीच लक्ष द्यावे, अशी मागणी श्रमजीवी संघटनेचे मुरबाड तालुका अध्यक्ष सुरज राजपूत यांनी केली आहे.