नालासोपारा, ता. २६ (बातमीदार) : चिंचोटी-कामण-अंजुरफाटा महामार्गाची दुरवस्था झाली आहे. या रस्त्यासाठी अनेकवेळा निविदा प्रक्रिया करण्यात आली, पण रस्ता झाला नसल्याने श्रमजीवी संघटना आक्रमक होताना रस्त्यावर उतरली आहे.
चिंचोटी-भिवंडी रस्त्याची दुरवस्था झाली आहे. रुग्णवाहिका, शाळेत जाणारी मुले, लांब पल्ल्याची वाहने खड्डंयामधून कराव्या लागणाऱ्या प्रवासाने त्रस्त आहेत. उन्हाळ्यात धुळीने तर पावसाळ्यात पाणी साचलेल्या खड्ड्यांमुळे या मार्गावर अनेक अपघात झाले आहेत. महत्त्वाचे म्हणजे, या रस्त्यासाठी ५२८ कोटींची निविदादेखील निघाली आहे, पण कामे अर्धवट असल्याने रस्ता नादुरुस्तच आहे. यासाठी अनेकवेळा स्थानिकांनी, वेगवेगळ्या संघटनांनी आंदोलन केले आहे, मात्र कोणताच तोडगा निघत नसल्याने श्रमजीवी संघटना आक्रमक झाली आहे. याच अनुषंगाने चिंचोटी-भिवंडी रस्त्यावर सकाळी साडेअकरा वाजता चुली पेटवून आंदोलन करण्यात आले. या आंदोलनात शेकडो कार्यकर्ते सहभागी झाले होते. या वेळी आंदोलकांनी ठेकेदारांची एसआयटीमार्फत चौकशी करा, तसेच तातडीने रस्त्याचे काम चालू करा, अशी मागणी करत महामार्गावरच ठाण मांडून बसले होते.
--------------------------------------
तब्बल सहा तास वाहतूक कोंडी
आंदोलनावेळी चिंचोटी ते कामनच्याही पुढेतर महामार्गावर ही १० ते १५ किलोमीटरपर्यंत वाहतूक कोंडी झाली होती. या रस्त्याची अनेक वर्षांपासून दुरवस्था आहे. ५२८ कोटींचे टेंडर निघाले, पण काम काही होत नाही, शासनाने याकडे तातडीने लक्ष द्यावे अन्यथा आणखी तीव्र आंदोलन करू, असा इशारा श्रमजीवी संघटनेचे जिल्हाध्यक्ष सुरेश रेंजड यांनी दिला आहे.