टोकावडे ता. २९ (बातमीदार)ः मुरबाडपासून धसई-पळू-सोनावळे असा ३५ किलोमीटरचा प्रवास करून सोनावळे गावालगत सह्याद्री पर्वतरांगेतील गणपतीची गडद लेणी पर्यटकांसाठी सध्या आकर्षणाचे केंद्र ठरत आहे, पण निसर्गाने नटलेल्या ऐतिहासिक ठिकाणाकडे प्रशासनाचे दुर्लक्ष होत आहे.
मुरबाड परिसरातील कोरीव लेण्या पावसाळी पर्यटकांचे आकर्षण आहे. या लेण्यांच्या प्रवेशद्वारावर गणेशाची मूर्ती कोरलेली असल्याने ‘गणपती गडद’ असे नाव प्राप्त झाले आहे. मूर्तीचे शिल्पकाम साधे पण प्रभावी आहे. इथे लहान लेण्या साधारणतः ध्यानधारणेसाठी किंवा छोट्या पूजेसाठी वापरण्यात आल्या असाव्यात, असा स्थानिकांचा अंदाज आहे. मुख्य गुहेच्या प्रवेशद्वारासह छताचा भार सांभाळणाऱ्या खांबांवर नक्षीकाम आहे. पावसाळ्यात मुख्य लेण्याच्या दारात कोसळणारा धबधबा मनाला भूरळ घालतो. दाट जंगल, वाहणारे झरे, धुक्याची चादर आणि पक्ष्यांच्या आवाजात इथे निसर्गाशी एकरूप होण्याचा अनुभव मिळतो. त्यामुळेच निसर्गप्रेमी, ट्रेकर्स आणि फोटोशूट करणारे पर्यटक सुट्टीच्या दिवशी आवर्जून भेट देत आहेत.
............................
भौतिक सुविधांची प्रतीक्षा?
लेणी बाहेरच्या धबधब्याचे कठडे, सुशोभीकरण करणे, कच्चा रस्ता असून, माहिती फलकांचा अभाव, सौरदिव्य, पिण्याच्या पाण्याची व टॉयलेटची अनुपलब्धतेमुळे पर्यटकांना विविध अडचणींचा सामना करावा लागतो. या लेण्यांचे संवर्धनासाठी पुढाकार घेतला आहे. श्री गणेश लेणी चॅरिटेबल ट्रस्ट (गणपती गडद) सोनावळे त्यांच्याकडून परिसराच्या विकासासाठी शासनाकडे वेळोवेळी मागण्या करण्यात आले आहेत.
.............................
कसे जाल?
मुरबाडपासून धसई-पळू-सोनावळे असा ३५ किलोमीटरचा प्रवास करून सोनावळे गावातून जाता येते. तसेच धसईपासून रामपूर मार्गे-भेरेवाडी या मार्गे जाता येते. रामपूर गावातून भेरेवाडीपर्यंत जाण्यासाठी रस्ता चांगला आहे. नंतर भेरेवाडी गावापासून सुरू होणारी पायवाट तासाभरात लेण्यापाशी सोडते.
................
काळजी घेण्याची गरज
पावसाळी भटकंतीसाठी गणपती गडद उत्तम पर्याय आहे, परंतु पर्यटकांनी काळजी घेण्याची गरज आहे. कारण गणेश लेणीचा डोंगरालगतचा काहीसा भाग धोकादायक असून, पावसाळ्यामध्ये अरुंद पायवाटा चिकट होत असल्याने अपघात होण्याची शक्यता अधिक असते.
.......................
लेणी पाहण्यासाठी येणाऱ्या पर्यटकांची संख्या दिवसेंदिवस वाढत आहे, मात्र येथे सुविधांचा अभाव आहे. परिसराचा विकास झाला तर स्थानिकांना रोजगार मिळेल. यासाठी परिसरात भौतिक सुविधांसाठी ट्रस्टच्या माध्यमातून शासनाला पत्रव्यवहार केला आहे.
- सुभाष भोईर, अध्यक्ष, श्री गणेश लेणी चॅरिटेबल ट्रस्ट, सोनावळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.