मनोर, ता. १ (बातमीदार) : पालघर जिल्ह्याच्या पोलिस अधीक्षकांनी जिल्ह्यात अवैध धंदे, तसेच गुटखा वाहतूक, तसेच विक्रीविरोधात मोहीम उघडली आहे. मनोर पोलिसांनी महिनाभरात केलेल्या दोन वेगवेगळ्या कारवायांमध्ये लाखोंचा गुटख्याचा साठा आणि वाहने जप्त करून गुटखामाफियांना जेरीस आणले आहे. गल्ली बोळात गुटखा उपलब्ध करून देणाऱ्या गुटखामाफियांचे कंबरडे मोडल्याने मनोर पोलिसांच्या कारवायांचे सर्वसामान्यांकडून स्वागत केले जात आहे.

मनोर पोलिसांच्या पथकाने ११ जून रोजी वरई-पारगाव रस्त्यावर सापळा रचून केलेल्या कारवाईत गुटखा वाहतूक करणाऱ्या दोन कार, तसेच दोन लाख ३५ हजारांचा गुटखा हस्तगत केला. गोपनीय माहितीच्या आधारे निर्माणाधीन मुंबई-बडोदा दृतगती महामार्गावरून होत असलेली गुटखा वाहतूक रोखत गुटखामाफियांना सोयीचा ठरत असलेला तस्करी नवीन मार्ग उघडकीस आणला. २९ जून रोजी ख्वाजानगर डोंगरी भागातील किराणा दुकानात छापा टाकून केलेल्या कारवाईत गुटख्याचा साठा जप्त करण्यात आला आहे. गोपनीय माहितीच्या आधारे ही कारवाई करण्यात आली. गुटखामाफियांविरोधात उघडलेल्या मोहिमेत मनोर पोलिस ठाण्याचे निरीक्षक रणवीर बयेस यांच्या मार्गदर्शनात कर्मचाऱ्यांकडून कारवाया करण्यात आल्या आहेत.