श्रीवर्धन बसस्थानकात गुरांढोरांचा संचार
नियंत्रण कक्ष, हिरकणी कक्ष, उपहारगृहांवर मोकाट गुरांचा ताबा
श्रीवर्धन, ता. २ (वार्ताहर)ः श्रीवर्धन बसस्थानक परिसरात मोकाट घोडे व गुराढोरांचा मुक्त संचार प्रवासीवर्गाला त्रासदायक ठरत आहे. एसटीचालकांनाही बसस्थानकातून गाडी बाहेर काढताना मोठी कसरत करत गाडी मार्गस्थ करावी लागते. त्‍यामुळे प्रशासनाकडून या मोकाट गुरांचा बंदोबस्‍त करण्यात यावा, अशी मागणी करण्यात येत आहे.
श्रीवर्धन बसस्थानकातून पहाटे ४ वाजल्यापासून रात्री ९.३० वाजेपर्यंत अनेक लांब पल्ल्याच्या तसेच स्थानिक गाड्यांच्या फेऱ्या सुरू असतात. तालुक्याचे मुख्यालय श्रीवर्धन असल्याने बहुतांश नागरिक एसटीचा वापर करतात. त्याचप्रमाणे श्रीवर्धन शहरात महाविद्यालय, विद्यालय असल्यामुळे शहराबाहेरील विद्यार्थ्यांची संख्या जास्त प्रमाणात आहे. शिवाय स्‍थानकात मोठ्या प्रमाणात पर्यटकांची ये-जा सुरू असते, मात्र मागील काही महिन्यांपासून स्‍थानकामध्ये मोकाट गुरांचा प्रश्न बिकट बनत चालला आहे. स्‍थानकामध्ये दिवस-रात्र घोडे व गुराढोरांचा मुक्त संचार सुरू आहे. श्रीवर्धन बसस्थानकाचे प्रशस्त आवार, प्रवेशद्वार, चारही फलाट, तर अनेकदा बसस्थानक इमारतीतील वाहतूक नियंत्रण कक्ष, हिरकणी कक्ष, उपहारगृह आदी परिसरात घोड्यांसह गुराढोरांच्या मुक्त संचारमुळे प्रवासीवर्गाची गैरसोय होत आहे. अनेकदा बसस्थानकातील ऑन ड्युटी असलेले कर्मचारी गुरांना हुसकावून लावताना दिसतात. बहुतेक वेळा नैसर्गिक विधी ही बसस्थानकाच्या इमारतीत हे प्राणी उरकत असल्याने परिसरात दुर्गंधी पसरते व त्याचा त्रास एसटी कर्मचारी व प्रवासीवर्गाला सहन करावा लागतो. मध्यंतरी घोड्याच्या लिदीवरून पाय घसरल्याने प्रवासी फलाटावर पडल्याची घटना घडली होती. एसटी बसस्थानकातून मार्गस्थ होत असताना मोकाट गुरांमुळे अडथळा निर्माण होतो. त्‍यामुळे प्रवाशांचा वेळ वाया जातो.
...............
मालकांवर कारवाई करण्याची मागणी
या जनावरांमध्ये भाकड गाई, पुरेसे पोषण न झालेली वासरे, तसेच रोगट किंवा अपंग झालेल्या घोड्यांची संख्या जास्त आहे. त्‍यामुळे त्‍यांच्या मालकांवर कारवाई करण्याची मागणी पुढे येत आहे. अनेक वेळा या गुरांचे मालक त्‍यांना मोकळे सोडतात. त्‍यांच्यावर कोणत्याही प्रकारचे उपचार न करता त्‍यांना सोडून दिल्याने त्‍यांचा मृत्यूही होतो. त्‍यामुळे प्रशासनाने अशा मालकांवर गुन्‍हा दाखल करून गुरांना योग्य स्‍थळी हलविण्यात यावे, अशी मागणी करण्यात येत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.