नेरूळ, ता. ३ (बातमीदार) : बेलापूर गावात एका सोसायटीत वीज मीटर खोलीमध्ये लपलेल्या घोरपडीची सुटका करण्यात प्राणिमित्रांना यश आले आहे. तब्बल तीन फुटांच्या घोरपडीची सुटका करून तिला निसर्गाच्या सानिध्यात सोडून देण्यात आले.
सीबीडी बेलापूर गावात राम मंदिराजवळ असलेल्या सोसायटीमध्ये एक घोरपड असल्याची माहिती तेथील नागरिकांनी पुनर्वसू फाउंडेशनला फोनवरून दिली. तसेच, या घटनेची माहिती सर्पमित्र अष्टविनायक मोरे यांना देण्यात आली. अष्टविनायक मोरे हे प्रीतम भुसाने, शशांक व सहकारी मित्र अपेक्षा जाधव, सृष्टी यांना घेऊन घटनास्थळी पोहोचले. तेथे जाऊन शोधमोहीम राबविण्यात आली. वीज मीटर खोलीमध्ये लाद्यांच्या खाली घोरपड लपून बसली होती. मीटरमध्ये असलेल्या लाद्या काढून घोरपडीला अलगद बाहेर काढण्यात आले. कोणतीही दुखापत न होता तिची तपासणी करून घोरपडीला निसर्गाच्या सानिध्यात सोडून देण्यात आले. पावसाळा सुरू झाल्याने अनेक जंगली प्राणी मानवी वस्तीत येत असतात. साप व इतर सरपटणारे प्राणी आढळल्यास न घाबरता, त्यांना न मारता सर्पमित्राला बोलवा. सर्पमित्र येऊन त्यांना सुखरूपरीत्या पकडून त्यांच्या अधिवासात सोडून देतील, असे मोरे यांनी सांगितले.