भिवंडी, ता. ३ (वार्ताहर) : भंगार गोळा करत असतानाच बंद घरे आणि दुकानांची रेकी करून लॅपटॉपची चोरी करणाऱ्याला शांतीनगर पोलिसांनी शिताफीने अटक केली. त्याच्याजवळून एक लाख रुपये किमतीचे सहा लॅपटॉप हस्तगत करण्यात यश मिळवले आहे, अशी माहिती पोलिस निरीक्षक विनोद पाटील यांनी पत्रकार परिषदेत दिली.
मागील आठवड्यात एका वकिलाच्या कार्यालयातून लॅपटॉप चोरीप्रकरणी दाखल गुन्ह्याचा तपास शांतीनगर पोलिस ठाण्याचे वरिष्ठ पोलिस निरीक्षक विनायक गायकवाड यांच्या मार्गदर्शनाखाली सहाय्यक पोलिस निरीक्षक योगेश गायकर करीत होते. त्यांच्या पथकातील पोलिस कर्मचारी संतोष मोरे, संतोष पवार, सैय्यद, किरण जाधव, दिनेश भुरकुड, रवींद्र पाटील, गणेश कांबळे, बर्वे, रोशन जाधव या पथकाने केला. शांतीनगर, कचेरी पाडा या परिसरातील ७०हून अधिक सीसीटीव्ही कॅमेरे तपासून एका संशयिताची माहिती मिळवली. इमरान गफुर शेख (वय २४) याला शिताफीने ताब्यात घेत चौकशी केली. त्याने शांतीनगर भागातील घरफोडीच्या चार गुन्ह्यांची कबुली दिली. त्याच्याजवळून एक लाख रुपये किमतीचे सहा लॅपटॉप हस्तगत करण्यात आले आहेत. घरफोडी करणारा चोरटा इमरान शेख हा भंगार गोळा करणारा आहे. भंगार गोळा करतानाच घर व कार्यालयांची रेकी करून तो घरफोडी करीत असल्याचे तपासात निष्पन्न झाले आहे.