विरार (बातमीदार) : आषाढी एकादशीच्या निमित्ताने वसईतील बाल विद्याविहार शाळेतील विद्यार्थ्यांचा दिंडीचा एक नयनरम्य सोहळा शाळेत पार पडला. प्रथमतः विठ्ठल-रुक्मिणीच्या प्रतिमेची फुलांनी सजवलेल्या पालखीत प्रतिष्ठापना करण्यात आली. प्रतिमेचे पूजन करून दिंडी सोहळ्यास प्रारंभ झाला. मुली नऊवारी साडी नेसून पांढराशुभ्र शर्ट, पायजमा, धोतर, टोपी, खांद्यावर भगव्या पताका घेतलेले बाल वारकरी टाळ-मृदंग वाजवत मोठ्या उत्साहाने या दिंडीत सहभागी झाले होते. भजन, अभंग, विठ्ठल भक्तिगीते यामुळे संपूर्ण परिसर विठ्ठलमय झाला होता. विठ्ठल-रखुमाईची प्रतिमा असलेली ही पालखी छोट्या मुलांनीच आपल्या खांद्यावर घेतली होती. शाळेच्या परिसरातून मुख्य रस्त्यावरून पुन्हा शाळेच्या आवारात आणून तिथे पुन्हा एकदा विठ्ठलनामाचा विद्यार्थ्यांनी गजर केला. या दिंडी कार्यक्रमातून विद्यार्थ्यांमध्ये समूहभावना, वृक्षप्रेम व वृक्षसंवर्धन जागृती करण्यात आली. या उपक्रमासाठी मुख्याध्यापिका नीलिमा लोपीस, शिक्षक-शिक्षकेतर कर्मचारी व पालक यांचे सहकार्य लाभले.