भोंदूबाबाकडून पत्नीचे अश्लील फोटो व्हायरल
नवी मुंबई, ता. ५ (वार्ताहर) ः उत्तर प्रदेशमध्ये राहणाऱ्या एका भोंदूबाबाने आपल्या पत्नीला नग्नावस्थेत अघोरी पूजा करण्यास भाग पाडल्याची तसेच पूजा करतानाचे पत्नीचे अश्लील फोटो व्हायरल केल्याची घटना उघडकीस आली आहे. या भोंदूबाबाचे कृत्य पत्नीला लक्षात आल्यानंतर पत्नीने वाशी पोलिस ठाण्यात तक्रार दाखल केली. त्यानुसार पोलिसांनी भोंदूबाबाविरोधात विविध कलमांन्वये गुन्हा दाखल करून त्याचा शोध सुरू केला आहे.

या प्रकरणातील ४२ वर्षीय तक्रारदार विवाहिता वाशी सेक्टर १५ मध्ये आपल्या आईसह व मुलांसह राहण्यास आहे. या विवाहितेने पहिल्या पतीपासून घटस्फोट घेतल्यानंतर पाच वर्षांपूर्वी तिने अभिषेक तिवारी (वय ३०) या भोंदूबाबासोबत लग्न केले होते. पीडिता काही महिन्यांपूर्वी वाशी येथे राहणाऱ्या आईकडे राहण्यास आली होती. पीडितेच्या भावाचे लग्न जुळत नसल्याने आरोपी अभिषेकने पत्नी व तिच्या आईला नग्नावस्थेत अघोरी पूजा करण्यास सांगितले. या पूजेदरम्यान त्यांना नग्नावस्थेतील फोटो मोबाईलमध्ये काढण्यास सांगून ते फोटो स्वत:कडे मागून घेतले होते. त्यानंतर या भोंदूबाबाने पीडितेला अजमेर (राजस्थान) येथे येण्यास सांगितले होते; मात्र अजमेर येथे न आल्याने आरोपीने पीडिता व तिच्या आईचे अघोरी पूजा करतानाचे नग्नावस्थेतील फोटो पीडितेचे वडील व भाऊ यांना व्हॉट्सॲपवर पाठवून त्यांची बदनामी केली. हा प्रकार पीडितेला समजताच तिने वाशी पोलिस ठाण्यात याप्रकरणी तक्रार दाखल केली.