ब्लॉक संपताच ट्रेन बिघडली
हार्बर मार्गावरील वाहतूक विस्कळित

सकाळ वृत्तसेवा
मुंबई, ता. ६ : मध्य रेल्वेच्या हार्बर मार्गावरील प्रवाशांसाठी रविवार मनस्तापाचा ठरला. रेल्वेच्या देखभाल ब्लॉकनंतर अवघ्या काही मिनिटांतच सीवूड्स दारावे आणि नेरूळदरम्यान टीआरटी ट्रेनचे एक चाक रुळावरून घसरले. त्यामुळे वाशी-पनवेलदरम्यान अप आणि डाऊन मार्गांची वाहतूक पूर्णपणे विस्कळित झाली.
ही घटना रविवारी दुपारी ४.३२ वाजता घडली. रेल्वेचे अभियांत्रिकी पथक तत्काळ घटनास्थळी दाखल होऊन अर्ध्या तासात मार्ग मोकळा केला; मात्र तोपर्यंत हार्बर मार्गावरील लोकल गाड्या थांबून थांबून धावत होत्या. घटनेनंतर सीएसएमटी-वाशी, बेलापूर-पनवेल आणि ठाणे-नेरूळ या काही सेवा सुरू होत्या; मात्र सीएसएमटीहून पनवेलकडे जाणाऱ्या गाड्या ४० ते ५० मिनिटे उशिराने, तर पनवेलहून सीएसएमटीकडे येणाऱ्या गाड्या ३० मिनिटे उशिराने धावत होत्या. विशेष म्हणजे, सीएसएमटीहून दुपारी ३.१६ वाजता सुटलेली ट्रेन जी ४.३६ला पनवेलला पोहोचायला हवी होती, ती ५.३५ वाजता पोहोचली.
...
प्रवाशांच्या संयमाची कसोटी
मध्य रेल्वेच्या मुख्य आणि हार्बर मार्गावर रविवारी नियोजित ब्लॉक घेण्यात आला होता. ब्लॉक संपत आला तोच ज्याच्या साहाय्याने रूळ दुरुस्त केले जातात ती टीआरटी ट्रेनच अपघातग्रस्त झाली. ही बाब प्रवाशांच्या रोषास कारणीभूत ठरली. ‘ब्लॉक नकोसा होतो आणि आता दुरुस्ती साधनही अडथळ्याचे कारण ठरतेय,’ अशी प्रतिक्रिया काही संतप्त प्रवाशांनी दिली.