भिवंडी, ता. ७ (वार्ताहर)ः शहरात विक्रीसाठी आणलेल्या गुटख्यावर नारपोली पोलिसांनी छापा टाकून दोन लाख ६८ हजार ६०० रुपये किमतीचा गुटखा जप्त केला आहे. या प्रकरणात नारपोली पोलिसांनी रिक्षाचालकाला अटक केली.
धामणकर नाका ते अंजूरफाटा दरम्यान नॉर्दन पेट्रोलपंप नारपोली येथे रविवारी सायंकाळी साडेपाचच्या सुमारास स्थानिक पोलिसांचे पथक गस्त घालत होते. त्याच वेळी एका रिक्षातून गुटखा वाहतूक सुरू असल्याची माहिती पोलिसांना मिळाली. याचदरम्यान एम.एच.-०५-डी.एल.- १६३५ क्रमांकाच्या रिक्षाची तपासणी केली असता पोलिसांना २ लाख ६८ हजार ६०० रुपये किमतीचा गुटखा सापडला. पोलिसांनी रिक्षासह चालक कामील अन्सारीला गुन्हा दाखल करून अटक केली आहे.