पोलिस गस्त वाढविण्याची मागणी
खारघर (बातमीदार) ः खारघर सेक्टर १६ वास्तुविहार सोसायटीत तीन महिन्यांत दोन वेळा चोरीच्या घटना घडल्या आहेत. चोरट्यांनी रात्रीच्या वेळी जवळपास सात घरांतील ऐवज लुटला आहे. त्‍यामुळे वास्‍तुविहार सोसायटीतील रहिवाशांनी पोलिस गस्‍त वाढविण्याची मागणी केली आहे. खारघर सेक्टर १६ वास्तुविहारमध्ये तीन महिन्यापूर्वी उत्सव सोसायटीमधील चार घरांमध्ये चोरीच्या घटना घडल्या होत्या. त्‍यानंतर संस्कृती सोसायटीत प्रवेश करून किमती ऐवज लुटला होता. सुदैवाने या वेळी घरामध्ये कोणीही नव्‍हते, अन्यथा चोरट्यांकडून गंभीर दुखापत होण्याची शक्‍यता होती, असे रहिवाशांकडून सांगण्यात येत आहे. त्‍यामुळे येथील सोसायट्यांमध्ये मध्यरात्री नंतर पोलिस गस्‍त वाढविण्याची मागणी रहिवाशांनी केली आहे. या वेळी माजी नगरसेविका संजना कदम, शिवसेना ठाकरे गटाचे उपशहरप्रमुख नंदू वारुंगसे यांच्यासह संस्कृती सोसायटीच्या रहिवाशांनी पोलिसांना निवेदन दिले. या वेळी मोठ्या प्रमाणात रहिवासी सहभागी झाले होते.
....................
दिव्यांग विद्यार्थ्यांनी लुटला चित्रपटाचा आनंद
खारघर, ता. ७ (बातमीदार) : येथील राष्ट्रीय बौद्धिक दिव्यांगजन सशक्तीकरण संस्थेत शिक्षण घेणाऱ्या विद्यार्थी आणि पालकांनी ‘सितारे जमीन पर’ या प्रेरणादायी चित्रपटाचा आनंद लुटला. या वेळी जवळपास दोनशे दिव्यांग विद्यार्थी आणि त्यांचे पालक सहभागी झाले होते. ‘सितारे जमीन पर’ हा चित्रपट विशेष मुलांवर आधारित आहे. या चित्रपटामुळे दिव्यांग मुले आणि पालकांच्या मनात प्रेरणा निर्माण व्हावी, यासाठी राष्ट्रीय बौद्धिक दिव्यांगजन सशक्तीकरण संस्था आणि इनरव्हील क्लब खारघर, नवी मुंबई सनराईज यांच्या संयुक्त विद्यमाने खारघर येथील लिटिल वर्ल्ड सिनेमागृहात शनिवारी (ता. ५) रात्री या विशेष शोचे आयोजन करण्यात आले होते. विशेष म्हणजे, इनरव्हील क्लबच्या अध्यक्षा मनीषा पाणीग्रही आणि सहकाऱ्यामुळे दिव्यांग मुले आणि पालकांना चित्रपटाचा आनंद घेता आला असल्याचे राष्ट्रीय बौद्धिक दिव्यांगजन सशक्तीकरण संस्थेचे प्रभारी अधिकारी डॉ. रवी प्रकाश सिंह यांनी सांगितले. या कार्यक्रमास रोटरी क्लब ऑफ नवी मुंबई, सनराईज आणि इनरव्हील क्लबचे इतर सदस्य उपस्थित होते.