सकाळ वृत्तसेवा
ठाणे, ता. ८ : पारंपरिक भातलागवडीच्या तुलनेत पट्टा पद्धत व यांत्रिकी पद्धतीने शेती केल्यास होणारा खर्च, मिळणारे उत्पन्न याचा ताळमेळ समजावून सांगत, मुख्य कार्यकारी अधिकारी रोहन घुगे यांनी शाश्वत शेतीसाठी आधुनिक पद्धतींचा अवलंब आवश्यक असल्याचे मत व्यक्त केले. वास्तववादी उदाहरणांसह त्यांनी स्पष्ट केले.
शहापूर येथील अल्याणी व गेगाव या गावांमध्ये ठाणे जिल्हा परिषद व कृषी विभाग यांच्या संयुक्त विद्यमाने शेतकऱ्यांसाठी आधुनिक शेतीसंदर्भातील उपक्रम राबविण्यात आले. या वेळी जिल्हा परिषद ठाण्याचे मुख्य कार्यकारी अधिकारी रोहन घुगे, जिल्हा कृषी अधीक्षक रामेश्वर पाचे, कृषी विकास अधिकारी मुनीर बाचोटीकर, गटविकास अधिकारी, तालुक्यातील अधिकारी व कर्मचारी, शेतकरी उपस्थित होते. कार्यक्रमांतर्गत अल्याणी येथे पट्टा पद्धतीने, तर गेगाव येथे मशीनद्वारे भातलागवडीचे प्रात्यक्षिक राबविण्यात आले. दोन्ही ठिकाणी शेतकऱ्यांची उत्स्फूर्त उपस्थिती होती.
घुगे यांनी शेतकऱ्यांशी संवाद साधत साहित्याचा योग्य वापर कसा करावा, याबाबत सविस्तर मार्गदर्शन केले. शेतकऱ्यांनी भविष्यात तूर लागवडीचे क्षेत्र वाढवण्यासाठी प्रयत्नशील राहावे. यासोबतच भात व भाजीपाला उत्पादनानंतर त्याच्या विपणनासाठी शेतकरी गट कंपनी स्थापनेचे महत्त्व सांगण्यात आले. ही कंपनी शेतमालाच्या विक्रीतून शेतकऱ्यांना आर्थिक फायदा कसा करून देऊ शकते, याबाबत शेतकऱ्यांना समजावून सांगितले.

कृषी साहित्याची पाहणी
उपक्रमामध्ये महिला बचत गटांनाही विशेष महत्त्व दिले असून, जिल्हा परिषदतर्फे त्यांना सर्वतोपरी मदत करण्यात येईल, असे आश्वासन घुगे यांनी दिले. यावेळी जिल्हा परिषद सेस फंड योजनेअंतर्गत डीबीटीद्वारे शेतकऱ्यांना वाटप करण्यात आलेल्या कृषी साहित्याची पाहणी केली. तसेच घुगे यांच्या हस्ते मग्रारोहयो योजनेअंतर्गत बांबू व आंबा वृक्षलागवड करण्यात आली.