सकाळ वृत्तसेवा
ठाणे, ता. ७ : शहरात काही दिवसांपासून कोसळणाऱ्या पावसामुळे वृक्षांसह त्यांच्या फांद्या उन्मळून पडण्याच्या घटना घडत आहेत. अशातच भास्कर कॉलनी येथील चिखलवाडी भागात काही दिवसांपूर्वी झाड पडून घरांचे नुकसान झाले होते. त्या गोरगरीब नागरिकांच्या मदतीला डॉ. राजेश मढवी फाउंडेशन धावून आले आहे. नुकसानग्रस्त घरांना सिमेंटच्या पत्र्यांचे वाटप करून मदतीचा हात देत दिलासा दिला.
ठाणे पालिका क्षेत्रात काही दिवसांपासून पावसाने दमदार हजेरी लावली आहे. पावसाबरोबर सुटलेल्या सोसाट्याच्या वाऱ्यामुळे वृक्षांच्या फांद्या व वृक्ष पडण्याच्या घटना घडत आहे. या घटनांमध्ये वाहनांचे व घरांचे अधिक नुकसान झाल्याचे दिसून येत आहे. अशातच ३ जुलैला पडलेल्या मुसळधार पावसामुळे भास्कर कॉलनीतील चिखलवाडी येथील घरे आणि मंदिराचे नुकसान झाले. त्या वेळी ठाणे पालिकेच्या आपत्ती विभागाने त्वरित धाव घेऊन वृक्षाच्या फांद्या हटवल्या. मात्र, घरांची नुकसान भरपाई देणार कोण, असा प्रश्न उभा राहिला होता. याची दखल घेत स्थानिक माजी नगरसेविका प्रतिभा मढवी व डॉ. राजेश मढवी यांनी गोरगरिबांच्या क्षतिग्रस्त घरांसाठी आणि मंदिरासाठी सिमेंटच्या पत्र्यांची मदत केली.