सकाळ वृत्तसेवा
ठाणे, ता. ७ : नोकरीच्या शोधात व नोकरीनिमित्त ठाणे, मुंबई शहरात मोठ्या प्रमाणात पुरुषांच्या जोडीला महिलाही येत आहे. या महिलांना राहण्याची माफक दरात व्यवस्था व्हावी, यासाठी ठाणे पालिका प्रशासनाने पावले उचलण्यास सुरुवात केली आहे. त्यानुसार भाईंदरपाडा येथील पालिकेच्या सुविधा भूखंडावर नऊ मजली अद्ययावत इमारत बांधण्याचा निर्णय घेतला आहे. या वसतिगृहात सुमारे ४०२ नोकरदार महिलांना राहता येणार आहे. अत्यंत माफक दरात वसतिगृह उपलब्ध होणार असून, यासाठी केंद्राकडून ५० कोटींचा निधी उपलब्ध झाला आहे.
मुंबई शहराला लागून असलेल्या ठाणे शहरात आयटी कंपनी, उद्योग व्यवसाय वाढत आहे. त्याच जोडीला नागरकीकरणही होत आहे. त्यात येथील घरांच्या किमतीही वाढत आहे. त्यामुळे नोकरीनिमित्त ठाणे व मुंबईसारख्या शहरांमध्ये येणाऱ्या महिला वर्गाला ठाण्यात राहण्यासाठी सुरक्षित जागा मिळवण्याचा प्रश्न मार्गी लागणार आहे. महिलांच्या घरांच्या गरजा पूर्ण करण्यासाठी डिझाइन केलेली वॉकिंग वुमन हॉस्टेल योजना सुरू केली. व्यावसायिक कामामुळे घराबाहेर पडणाऱ्या महिलांना सोयीस्कर निवासस्थान उपलब्ध करून देण्यासाठी महिला वसतिगृह बांधण्यात येणार अतिरिक्त आयुक्त संदीप माळवी यांनी स्पष्ट केले. त्यानुसार या कामाच्या उभारणीचा प्रस्ताव नुकत्याच झालेल्या प्रशासकीय महासभेत या संदर्भातील प्रस्तावाला मंजुरीही देण्यात आली आहे.

या महिलांनाही योजनेचा लाभ
विधवा, घटस्फोटित आदी महिलांसह कुटुंबातील जवळचे कोणतेही सदस्य त्या शहरात नाहीत, अशा विवाहित महिलांनाही या योजनेचा लाभ मिळणार आहे. याशिवाय नोकरीसाठी प्रशिक्षण घेणाऱ्या महिलांनाही या ठिकाणी ३० टक्क्यांपर्यंत जागा आरक्षित असणार आहेत.

वसतिगृहावर दृष्टिक्षेप
वसतिगृहात पुरेशी पार्किंग व्यवस्था, फूड कोर्ट, व्यायामशाळेसाठी पुरेशी जागा अशा सुविधांचा अंतर्भाव असणार आहे. इमारतीचे बांधकाम क्षेत्र चार हजार ५२३ चौरस मीटर इतके आहे. इमारत उभारण्यासाठी ५० कोटींचा खर्च अपेक्षित धरण्यात आला आहे.