मेट्रो-मोनोमुळे मुंबईकरांची रखडपट्टी
आठवड्याच्या पहिल्याच दिवशी तांत्रिक बिघाड
मुंबई, ता. ७ ः लोकलपाठोपाठ दळणवळणाचा महत्त्वाचा पर्याय असलेल्या मेट्रो आणि मोनो रेलमध्ये तांत्रिक बिघाड झाल्याने मुंबईकरांची आठवड्याच्या पहिल्याच दिवशी रखडपट्टी झाली. वर्सोव्याहून घाटकोपरला जाणाऱ्या मेट्रो पुरेसा वेग घेत नसल्याने ती सेवेतून काढण्यात आली, त्यात बराच वेळ गेल्याने मेट्रोच्या सर्वच स्थानकांवर मोठ्या प्रमाणात गर्दी झाली होती. दुसरीकडे मोनोतही तांत्रिक बिघाड झाल्याने ही सेवा दीड ते दोन तास विस्कळित झाली होती.
लोकलप्रमाणेच दररोज खचाखच गर्दीत गारेगार प्रवास करणाऱ्या मेट्रो-१च्या प्रवाशांना आज प्रचंड मनस्ताप सहन करावा लागला. वर्सोव्याहून घाटकोपरच्या दिशेने जाणारी मेट्रो अपेक्षित वेग घेत नसल्याने ती डी.एन.नगर स्थानकात आल्यानंतर अचानक रद्द करण्यात आली. ऐन गर्दीच्या वेळी मेट्रो रद्द केल्यानंतर ती सेवेतून काढण्यात बराच वेळ लागल्याने संपूर्ण मेट्रोसेवाच विस्कळित झाली. त्यामुळे घाटकोपर, साकीनाका, मरोळ, अंधेरीसह सर्वच स्थानकांमध्ये प्रवाशांची प्रचंड गर्दी झाल्याने गैरसोय झाली.
---
घाटकोपर स्थानकात तोबा गर्दी
दर तीन मिनिटांनी धावणाऱ्या मेट्रोची रखडपट्टी झाल्याने अन्य फेऱ्यांवर परिणाम झाला. त्यामुळे सर्वच मेट्रोस्थानकांवर प्रवाशांची प्रचंड गर्दी झाली होती. घाटकोपर स्थानकात पाय ठेवायलाही जागा नसल्याची परिस्थिती निर्माण झाली होती. अनेक प्रवासी लोकलच्या पादचारी पुलावर उभे राहून मेट्रोस्थानकात प्रवेशासाठी प्रतीक्षा करीत होते.
----
अतिरिक्त डबे खरेदी करणार
तांत्रिक बिघाडानंतर अनेकदा मेट्रोसेवा रद्द कराव्या लागतात. त्याचा भाग पुढील फेऱ्यांवर येतो, त्यामुळे निर्माण झालेली गर्दी पुढील फेऱ्यांमध्ये सामावून घेता यावी, म्हणून मेट्रो-१ प्रशासनाने अतिरिक्त डबे खरेदी करण्याची योजना आखली आहे. तसेच गर्दीच्या वेळी घाटकोपर-अंधेरीदरम्यान अतिरिक्त मेट्रोसेवा चालवता येईल का, याबाबत मेट्रो-१कडून विचार सुरू आहे.
---
बिघाडामुळे मोनो ठप्प
वडाळा-प्रतीक्षानगर स्थानकादरम्यान सकाळी नऊच्या सुमारास बिघाडामुळे मोनो मार्गावरील सेवा दीड ते दोन तास विस्कळित होती. त्यामुळे एकीकडे गाड्या विलंबाने धावत असल्याने स्थानकांत गर्दी झाली होती. गाडीत बिघाड झाल्याने सेवा काही काळ धीम्या गतीने चलवाव्या लागल्याचे स्पष्टीकरण एमएमआरडीएने दिले आहे.
----
मेट्रो-१बाबत...
मार्ग : घाटकोपर- अंधेरी- वर्सोवा
अंतर : १०.८१ किमी
एकूण स्थानके : १२
वारंवारिता : ३ मिनिटे
उद्घाटन : ८ जून २०१४
--
महत्त्वाचे बिघाड
१९ जून
दुपारी वाऱ्यामुळे आझादनगर स्थानकात ताडपत्री ओव्हरहेड वायरवर पडल्याने सुमारे अर्धा तास वर्सोव्याच्या दिशेने जाणारी मेट्रो सेवा ठप्प होती.

१९ मे
सायंकाळी गर्दीच्या वेळी मेट्रो ट्रेनमध्ये बिघाड झाल्याने ४५ मिनिटे सेवा बंद होती.
-----
मोनो रेलबाबत...
मार्ग : चेंबूर ते संत गाडगेबाबा चौक
अंतर : १९.५४ किमी
एकूण स्थानके : १८
वारंवारिता : १५ मिनिटे
उद्घाटन : २ फेब्रुवारी २०१४
---
महत्त्वाचे बिघाड
१० मार्च २०२५
चेंबूर स्थानकात तांत्रिक बिघाड, अर्धा तास पूर्ण सेवा ठप्प

५ ऑगस्ट २०२४
सिग्नल यंत्रणेत बिघाड; तासभर पूर्ण सेवा बंद